కట్టెదుర వైకుంఠము కాణాచయిన కొండ - అన్నమాచార్యుల వారి కృతి

కట్టెదుర వైకుంఠము కాణాచయిన కొండ

తెట్టలాయ మహిమలే తిరుమల కొండ

వేదములే శిలలై వెలసినది కొండ

యేదెస బుణ్యరాసులే యేరులైనది

కొండకాదిలి బ్రహ్మాదిలోకముల కొనల కొండ

శ్రీదేవుడుండేటి శేషాద్రి కొండ 

సర్వదేవతలు మృగజాతులై చరించేకొండ

నిర్వహించి జలధులే నిట్టచరులైన కొండ

వుర్విదపసులే తరువులై నిలచిన కొండ

పూర్వటంజనాద్రి యీ పొడవాటి కొండ

వరములు కొటారుగా వక్కాణించి పెంచే కొండ

పరగు లక్ష్మీకాంతు సోబనపు కొండ\

కురిసి సంపదలెల్ల గుహల నిండిన కొండ

విరివైనదదివో శ్రీవేంకటపు కొండ 

ఎదురుగా కనిపిస్తున్న ఈ తిరుమల కొండే భూమిపై ప్రత్యక్షమైన వైకుంఠము; లెక్కకు అందని మహిమలకు నిలయమైన దివ్యమైన కొండ. ఈ కొండపై ఉన్న శిలలే వేదాలు రూపుదాల్చి వెలసినట్లున్నాయి. అన్ని దిక్కులలోని పుణ్యరాశులే ఇక్కడ ప్రవహించే ఏరులుగా మారినట్లున్నాయి. బ్రహ్మలోకము మొదలైన దివ్యలోకాల శిఖరాలన్నింటికీ మించిన ఈ కొండ. శ్రీమహావిష్ణువు నివసించే పవిత్రమైన శేషాద్రి. సర్వదేవతలే ఇక్కడ వివిధ మృగజాతుల రూపాలలో సంచరిస్తున్నారు. సముద్రాలే తమ స్వరూపాన్ని మార్చుకొని ఇక్కడి జలచరాలుగా నివసిస్తున్నాయి, భూమిపై తపస్సు చేసే మహాతపస్వులే వృక్షాలుగా నిలిచి స్వామిని సేవిస్తున్నారు. పూర్వం అంజనాద్రిగా ప్రసిద్ధి పొందిన ఈ ఎత్తైన కొండ ఎంతో పవిత్రమైనది. కోరిన వరాలను సమృద్ధిగా ప్రసాదిస్తూ తన మహిమను మరింతగా చాటుతున్న కొండ ఇది, లక్ష్మీదేవికి పతియైన శ్రీమహావిష్ణువు వెలసిన శోభాయమానమైన కొండ ఇది. సమస్త సంపదలు వర్షించినట్లుగా దీని గుహలన్నీ సంపదలతో నిండి ఉన్నాయి. అదిగో, విశాలంగా విరాజిల్లుతున్న ఆ శ్రీ వేంకటాచలమే సాక్షాత్తు వైకుంఠస్వరూపమైన తిరుమల కొండ.

హిందోళ రాగంలో స్వరపరచబడిన ఈ అన్నమాచార్యుల వారి కృతిని ప్రియ సోదరీమణులు హరిప్రియ-షణ్ముఖప్రియ ఆలపించారు.