కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
నందకుమారా కృష్ణమా గోపాల బాలకృష్ణమ్మా నవనీతచోర కృష్ణమ్మా గోపాల బాలకృష్ణమ్మా
మందరధీర కృష్ణమ్మా మణిమాలహార కృష్ణమ్మా గోపాల బాలకృష్ణమ్మా గోపాల బాలకృష్ణమ్మా
లాలపోసెద చిన్నిబాలుడ నిన్ను ఉయ్యాలలోననుంచి జోలపాడెద రారా కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
తిరుమణశ్రీచూర్ణము ఆరువుగ దిద్ది పెరుగేసి చద్దిబువ్వ త్వరగా పెట్టెద రారా కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
పట్టుపుట్టముగట్టి పట్టంచుకండువగట్టి పట్టుదట్టి నడుముకు గట్టిగ కట్టెద రారా కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
పప్పు బెల్లము తియ్య అప్పాలు చెఱుకు నీకు ఇపుడే పెట్టెద మాయప్పా ఒప్పులకుప్ప కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
పానకము వడపప్పు పంచదారయు తేనె తిన మిఠాయి నీకు చానా పెట్టెద రారా కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
వెన్నపెట్టెద పైడిచిన్నిగిన్నెలో మీగడ ఉన్నాది తిందువు రారా చిన్ని ముద్దుల బాల కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
మామిడి పెద్ద పెద్ద జామి నేరేడి జీడిమామిడి పండు నీకు జాముసేపాయె తెచ్చి కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
కదళీ కర్పూర నారికేళ పనస ద్రాక్ష ఖండ శర్కర నీకు కలిపి పెట్టెద రారా కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
మురళీ గొలుసులు కంటె ముంజేతిమురుగులు పెట్టుదు పరుగుపరుగున రారా బాజాబందీలు కట్టెద కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
వేణునాదము చేత ఆడుకొందువు మృదువాణి జపమావర్తి వేణుగోపాల బాల కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
పుడమిలో గుడిమెళ్లంకపురవాసుడైన వరరంగదాసునికిపుడు వరములిచ్చిన తండ్రి కృష్ణమ్మా
కృష్ణమ్మా గోపాల బాలకృష్ణమ్మా గోవింద బాల కృష్ణమ్మా గోపాల బాల కృష్ణమ్మా
ఓ కృష్ణమ్మా! గోపాల బాలకృష్ణా! గోవిందా! నందకుమారా! వెన్నను దొంగిలించే నవనీతచోరా! మందర పర్వతాన్ని ధరించిన ధీరుడా! మణిమాలలు ధరించిన సుందర కృష్ణా! నిన్ను చిన్నిబాలుడిగా ఉయ్యాలలో ఉంచి లాలపోస్తూ జోలపాడెదను, రారా కృష్ణా. నీకు తిరుమణి శ్రీచూర్ణము చక్కగా దిద్ది, పెరుగుతో చద్దిబువ్వ కలిపి త్వరగా తినిపించెదను. పట్టుబట్టలు తొడిగి, పట్టంచు కండువా వేసి, నడుముకు వస్త్రమును గట్టిగా కట్టెదను. పప్పు, బెల్లము, తియ్యని అప్పాలు, చెరకు నీకు పెట్టెదను; నా తండ్రీ, అందాలరాశివైన కృష్ణా రారా. పానకము, వడపప్పు, పంచదార, తేనె, మిఠాయిలు సమృద్ధిగా పెట్టెదను. చిన్న బంగారు గిన్నెలో వెన్నను, మీగడను పెట్టి తినిపించెదను, నా చిన్ని ముద్దుల బాలకృష్ణా రారా. పెద్ద పెద్ద మామిడిపండ్లు, జామపండ్లు, నేరేడుపండ్లు, జీడిమామిడిపండ్లు తెచ్చి నీకు పెట్టెదను; అరటిపండ్లు, కర్పూరం, కొబ్బరి, పనస, ద్రాక్ష, ఖండశర్కర అన్నీ కలిపి సమర్పించెదను. నీకు మురళి, గొలుసులు, చేతులకు మురుగులు అలంకరించి, బాజాబందీలు కట్టెదను; పరుగుపరుగున రారా కృష్ణా. మధురమైన మాటలు పలికే వేణుగోపాలా! వేణునాదము చేస్తూ ఆనందంగా ఆడుకొందువు గాక. ఈ భూమిపై గుడిమెళ్లంకపురంలో నివసించే వరరంగదాసునికి వరములు ప్రసాదించిన తండ్రివి నీవే కృష్ణా!
ప్రయాగ రంగదాసు గారు మన ఆంధ్రప్రదేశ్ లో పుట్టిన ఒక వాగ్గేయకారులు. మంగళంపల్లి బాలమురళీకృష్ణగారి మాతామహులు వీరు. ఈయన ఎన్నో మంచి కీర్తనలు శ్రీరాముని మీద, కృష్ణుని మీద, అమ్మ వారి మీద రచించారు. రంగదాసు గారు శ్రీమద్వాల్మీకి రామాయణంలోని బాలకాండం ప్రేరణతో రాముడుద్భవించినాడు అనే కీర్తన రాశారు. కోనసీమలోని గుడిమెళ్లంకపురం వీరి స్వగ్రామం. రంగదాసు గారు తన ముద్రగా తన స్వగ్రామాన్ని వాడటం ఆయన వ్యక్తిత్వాన్ని చూపుతుంది. వీరు గుడిమెళ్లంక నుండి వెళ్లి ప్రయాగలో స్థిరపడ్డారని, కొన్ని వందల కృతులను రచించి, స్వరపరచి ఎందరికో నేర్పించారని నోటిమాట ద్వారా బాలమురళీకృష్ణ గారు శిష్యులకు చెప్పారు. వారు రచించిన ఓ అద్భుతమైన కృతి, అచ్చతేనెతెలుగులో. ఈ కృతిని ప్రిన్స్ రామవర్మ గారు ఆలపించారు.
కామెంట్లు లేవు:
కామెంట్ను పోస్ట్ చేయండి