ఎటులైన భక్తి వచ్చుటకే యత్నము సేయవే
మటుమాయ భవమును మనదని యెంచక
వటపత్ర శయనుని పాదయుగములందు
విద్యాగర్వములేల? నీవవిద్యా వశము గానేల?
ఖద్యోతాన్వయ తిలకుని పురమేలు బుద్ధి యాశుగ దోచనేల? ఓ మనసా!
రామ నామము సేయ సిగ్గా? కారాదేమి బల్కవు పుంటి బుగ్గ
భామలు గరదాటక యుండిన జగ్గ పామర మేను నమ్మక నీటిబుగ్గ
భోగ భాగ్యములందు నిజ భాగవతులకౌ నీ పొందు
త్యాగరాజ వరదుని నీ యందు బాగుగ ధ్యానించు భవ రోగమందు
ఓ మనసా! ఏ విధముగానైనా భక్తి వచ్చే ప్రయత్నము చేయుము. మటుమాయమయ్యే ఈ భవసాగరము శాశ్వతమని తలచక వటపత్రశాయి అయిన శ్రీహరి పాదములందు ఏ విధముగానైనా భక్తి వచ్చే ప్రయత్నము చేయుము. విద్యతో గర్వము ఎందుకు? నీవు అజ్ఞానానికి వశుడవగుట ఎందుకు? సూర్యవంశతిలకుడైన శ్రీరాముని పురమైన అయోధ్యకు త్వరగా పోవుటకు నీకు బుద్ధి ఎందుకు కలుగదు? ఏ విధముగానైనా భక్తి వచ్చే ప్రయత్నము చేయుము. రామనామ స్మరణ చేయుటకు సిగ్గా? లేక నామస్మరణ నిషిద్ధమా? లేక నీ నోట కురుపేమైనా లేచినదా? వారకాంతల వైపు నీ దృష్టి మరలకున్న మేలు. ఓ పామరుడా! ఈ శరీరమును నమ్మకు, ఇది నీటి బుగ్గలా అశాశ్వతము. భోగ భాగ్యములందు కూడా నిజమైన భాగవతోత్తములతో సాంగత్యమునుంచుకొని త్యాగరాజునికి అభయమిచ్చిన శ్రీరాముని మనసులో బాగా ధ్యానించి అదే ఈ భవరోగమునకు మందు. ఓ మనసా! ఏ విధముగానైనా భక్తి వచ్చే ప్రయత్నము చేయుము.
మాయామయమైన ప్రపంచములో మునిగి తేలే మానవుడికి త్యాగరాజస్వామి ఎలాగైనా భక్తిమార్గములోకి వెళ్లే ప్రయత్నం చేయమని ఓ చక్కని కృతి రచించి సామ రాగంలో కూర్చారు. ఈ కృతిని మల్లాది సోదరులు ఆలపించారు.
కామెంట్లు లేవు:
కామెంట్ను పోస్ట్ చేయండి