సకలేంద్రియములార జరుగ సమయము గాదు - భద్రాచల రామదాసు కృతి

సకలేంద్రియములార జరుగ సమయము గాదు సద్దు సేయక యుండరే

ప్రకటముగ మా యింట పండుగై జానకీపతిపూజ సేయు వేళ మీరు  

నిరతము పదునాలుగు భువనములు కుక్షిలో నిర్వహించెడి స్వామిని

ఇరవుగను నా హృదయకమలకర్ణిక మధ్యమున భక్తి నుంచుకొనియు

శరణాగతత్రాణ బిరుదు గల్గిన తండ్రి కరుణింపుమని వేడుచు

నరసింహదేవులకు పంచామృత స్నానమొనరించు వేళ మీరు    

శిరమునను శతకోటి సూర్యులను మించు భాసుర కిరీటమును ధరించి

హరి పాద కమలములకును మంచి స్వర్ణంపు పూవులను పూజ చేసి

ఉరు ధూప దీప నైవేద్య తాంబూలాది సకలోపచారములొసగి

సరస భద్రాద్రీశునకు రామదాసుండు సాష్టాంగ నతి సేయు వేళ మీరు

ఓ నా ఇంద్రియములారా! ఇది మీరు మీ ఇష్టానుసారం ప్రవర్తించే సమయం కాదు; ఎలాంటి అలజడి చేయకుండా నిశ్చలంగా ఉండండి. మా ఇంట్లో జానకీపతియైన శ్రీరాముని పూజ జరుగుతున్న ఈ వేళ నాకు మహాపండుగ వంటిది. పదునాలుగు భువనాలనూ తన కుక్షిలో నిరంతరం నిలిపి పోషించే ఆ పరమాత్మను నా హృదయకమలంలోని కర్ణిక మధ్యలో భక్తితో నిలుపుకొని, శరణాగతులను రక్షించడం తన బిరుదుగా కలిగిన తండ్రీ! నన్ను కరుణించు అని ప్రార్థిస్తూ నరసింహదేవునికి పంచామృతాలతో అభిషేకం చేస్తున్నాను. శిరస్సుపై వందకోట్ల సూర్యుల కాంతిని మించిన ప్రకాశవంతమైన కిరీటాన్ని ధరించిన శ్రీహరి పాదకమలాలను మంచి బంగారు పుష్పాలతో పూజించి, ధూపం, దీపం, నైవేద్యం, తాంబూలం మొదలైన సమస్త ఉపచారాలను భక్తితో సమర్పిస్తున్నాను. చివరగా మనోహరుడైన భద్రాద్రీశుని సన్నిధిలో రామదాసు తనను తాను పూర్తిగా సమర్పించుకొని సాష్టాంగ నమస్కారం చేస్తున్న ఈ పవిత్రమైన పూజావేళలో, ఓ ఇంద్రియములారా! మీ చంచలత్వాన్ని విడిచి మౌనంగా, ఏకాగ్రతతో భగవంతునిపైనే నిలిచి ఉండండి అని రామదాసు తన ఇంద్రియాలనే సంబోధిస్తూ ఈ కీర్తనలో వేడుకుంటున్నారు.

మోహన రాగంలో స్వరపరచబడిన ఈ భద్రాచల రామదాసు కృతిని శేషులత విశ్వనాథ్ గారు ఆలపించారు.