తారక మంత్రము కోరిన దొరికెను ధన్యుడనైతిని ఓరన్నా
మీరిన కాలుని దూతల పాలిటి మృత్యువుయని మదినమ్ముక యున్న
నాకు తారకమైన శ్రీరామ మంత్రం లభించింది. అందువల్ల నా జన్మ ధన్యమైందని భావిస్తున్నాను సోదరా! నిర్ణీత కాలాన్ని మించి జీవిని తీసుకుపోవడానికి వచ్చే యమదూతలకు కూడా ఈ రామనామమే మృత్యువని నా మనసులో గట్టిగా నమ్ముతున్నాను. ఇతర విషయాలపై మమకారం పెంచుకొని, లోకంలోని అనేక మాయామోహాలలో చిక్కుకోకు, రామనామం లభించిన తరువాత నూట ఎనిమిది తిరుపతులన్నీ వెదుక్కుంటూ తిరగవలసిన అవసరం లేదు. పుణ్యం వస్తుందని ఆశిస్తూ పుణ్యనదులన్నింటిలో మునగడం వల్ల ప్రయోజనం ఏముంది? పర్వదినాలు వచ్చినప్పుడల్లా పవిత్ర స్నానాల కోసం పరుగులు తీయడం కూడా అవసరం లేదు. ఎన్ని జన్మలుగా పరిశీలించినా ఉన్నవాడు ఒక్కడే నారాయణుడు, ఆయనే అనేక రూపాలుగా వెలసిన పరాత్పరుడు. ఆ మహాత్ముని దివ్యచరిత్రను విని, ఆయన నామాన్ని ఆశ్రయిస్తే ఎన్ని జన్మల నుంచి చేసిన పాపాలైనా ఈ జన్మతోనే తొలగిపోతాయి. ఇదే నాకు చివరి జన్మ, ఇక మళ్లీ పుట్టడం లేదనే సత్యం నాకు స్పష్టమైంది. నిర్మలమైన అంతర్దృష్టితో పరమాత్మనే లక్ష్యంగా చేసుకొని నిత్యానందంలో ఉన్నాను, కర్మబంధాలను విడిచిపెట్టి మోక్షానికి తీసుకువెళ్లే మార్గాన్ని నా కళ్లముందే చూస్తున్నాను. ధర్మమార్గం తప్పకుండా భద్రాద్రిలో వెలసిన శ్రీరాముడినే నా హృదయంలో సంపూర్ణంగా నమ్ముకొని ఉన్నాను. ఈ పరమ రహస్యాన్ని తెలుసుకున్న రామదాసు హృదయమనే మందిరంలో ఆ శ్రీరాముడు నిత్యంగా కొలువై ఉన్నాడు.
ధన్యాసి రాగంలో స్వరపరచబడిన ఈ భద్రాచల రామదాసు కృతిని మంగళంపల్లి బాలమురళీకృష్ణ గారు ఆలపించారు.
కామెంట్లు లేవు:
కామెంట్ను పోస్ట్ చేయండి