చేతః శ్రీ బాలకృష్ణం భజరే - ముత్తుస్వామి దీక్షితుల కృతి

చేతః శ్రీ బాలకృష్ణం భజరే రే

చింతితార్ధ ప్రద చరణారవిందం ముకుందం

నూతన నీరద సదృశ శరీరం నంద కిశోరం

పీత వసన ధరం కంబు కంధరం గిరిధరం

పూతనాది సంహారం పురుషోత్తమావతారం

శీతల హృదయ విహారం శ్రి రుక్మిణీ దారం 

నవనీత గంధ వాహ వదనం మృదు గదనం

నళిన పత్ర నయనం వటపత్ర శయనం

నవచంపక నాసికం అతసీ సుమ భాసకం

నతేంద్రాది లోకపాలకం మృగమద తిలకం

నవ తులసీ వనమాలం నారదాది ముని పాలం

కువలయాది పరిపాలం గురుగుహ నుత గోపాలం 

ఓ మనసా! బాలకృష్ణుని భజింపుము. కామ్యములను తీర్చే చరణారవిందములు కలిగిన ముకుందుని భజింపుము. క్రొత్త నీరుతో నిండిన నల్లని మేఘము వంటి శరీర ఛాయ కలవాడు, నందుని కుమారుడు, పీతాంబరము ధరించిన వాడు, శంఖము వంటి కంఠము కలవాడు, గోవర్ధన గిరిధరుడు, పూతనాది రాక్షస గణాన్ని సంహరించిన వాడు, పురుషోత్తముడైన అవతారుడు, సహృదయాలలో విహరించే వాడు, రుక్మిణీ దేవి పతి యైన బాలకృష్ణుని భజింపుము. నవనీతము, గంధము ముఖముపై కలవాడు, మృదువైన వాక్కు కలవాడు, నల్లని కలువ రేకుల వంటి కన్నులు కలవాడు, మఱ్ఱాకుపై శయనించే వాడు, అప్పుడే విరిసిన సంపెంగ పూవి వంటి ముక్కు కలవాడు, అవిసెపూవు వలె ప్రకాశించే వాడు, ఇంద్రుడు మొదలైన దేవతలచే నుతించబడిన వాడు, లోకేశ్వరుడు, కస్తూరి తిలకము, తులసీమాల ధరించిన వాడు, నారదాది మునులను పాలించే వాడు, భూమ్యాది గ్రహములను పరిపాలించే వాడు, గురుగుహునిచే నుతించబడిన వాడు అయిన గోపాలుని భజింపుము. 

ద్విజావంతి రాగంలోని ఈ కృతిని రంజని-గాయత్రి సోదరీమణులు గానం చేశారు. విని ఆనందించండి.