చేతః శ్రీరామం - సదాశివ బ్రహ్మేంద్రుల కృతి

చేతః శ్రీరామం చింతయ జీమూతశ్యామం

అంగీకృత తుంబురుసంగీతం హనుమద్గవయ గవాక్షసమేతం

నవరత్నస్థాపిత కోటీరం నవతులసీదళ కల్పితహారం

పరమహంస హృద్గోపురదీపం చరణదళిత మునితరుణీశాపం

ఓ మనసా! మేఘమువలె నీలవర్ణంతో ప్రకాశించే శ్రీరామచంద్రుని నిరంతరం ధ్యానించుము. తుంబురుడు తన దివ్యసంగీతంతో స్తుతించగా ఆనందంగా ఆలకించే వాడును, హనుమంతుడు, గవయుడు, గవాక్షుడు మొదలైన వానరవీరులతో పరివేష్టితుడై వెలుగొందే వాడును అయిన శ్రీరాముని చింతించుము. నవరత్నాలతో పొదిగిన కిరీటాన్ని ధరించి, అప్పుడే కోసిన తాజా తులసీదళాలతో కూర్చిన హారాన్ని అలంకరించుకున్న ఆ సుందరమూర్తిని మనసులో నిలుపుకొనుము. పరమహంసలైన మహాత్ముల హృదయమనే గోపురంలో వెలిగే జ్ఞానదీపమైన శ్రీరాముని ధ్యానించుము. తన పాదస్పర్శతో గౌతమ మహర్షి భార్య అహల్యకు కలిగిన శాపాన్ని తొలగించి ఆమెను ఉద్ధరించిన కరుణామయుడైన శ్రీరామచంద్రుని ఎల్లప్పుడూ ధ్యానించుము. 

సింధుభైరవి రాగంలో స్వరపరచబడిన ఈ సదాశివ బ్రహ్మేంద్రుల కృతిని మంగళంపల్లి బాలమురళీకృష్ణ గారు ఆలపించారు.