కంటి నేడు మా రాముల - భద్రాచల రామదాసు కీర్తన

కంటి నేడు మా రాముల కనుగొంటి నేడు మా రాముల

కంటి నేడు భక్త గణముల బ్రోచు మా

ఇంటి వేలుపు భద్రగిరినున్న వాని

చెలువొప్పుచున్నట్టి సీతాసమేతుడై

కొలువు తీరిన మా కోదండరాముని

తరణికుల తిలకుని ఘననీలగాత్రుని

కరుణారసము గురియు కనుదోయి గలవాని

హురుముంజి ముత్యాల సరములు మెరయగ

మురిపెంపు చిరునవ్వు మోము గల్గినవాని

కరకు బంగారు చేల కాంతి జగములు గప్ప

శర చాపములు కేల ధరియించు స్వామిని

ధరణిపై శ్రీరామదాసునేలెడి వాని

పరమపురుషుడైన భద్రగిరి స్వామిని

మా రాముని నేడు కనుగొని కాంచినాను. భక్త సమూహములను బ్రోచే మా యిలవేలుపైన వాని, భద్రగిరిపైన వెలసిన శ్రీరాముని నేడు కాంచినాను. సీతాసమేతుడై ఎంతో అందముగా కొలువైయున్న కోదండరాముని నేడి కాంచినాను. సూర్యవంశతిలకుడు, నీలమేఘశ్యాముడు, కరుణారసమును కురిపించే కన్నులు కల శ్రీరాముని నేడు కాంచినాను. ఎర్రని కాంతి గల మేలైన ముత్యాల హారములతో మెరయుచు, మురిపించే చిరునవ్వు ముఖము కల శ్రీరాముని నేడు కాంచినాను. కరుకైన బంగారు వస్త్రముల కాంతి లోకాలను కప్పగా, ధనుర్బాణములు చేత ధరించిన స్వామిని నేడు కాంచినాను. ఈ భూమిపై రామదాసును బ్రోచేవాడు, పరమపురుషుడైన భద్రాద్రి రాముని నేడు కాంచినాను.

బౌళి రాగంలో కూర్చబడిన ఈ కృతిని శేషులత బృందం ఆలపించారు.