అంతయు నీవే హరి పుండరీకాక్ష - అన్నమాచార్యుల వారు

అంతయు నీవే హరి పుండరీకాక్ష చెంత నాకు నీవే శ్రీరఘురామ

కులమును నీవే గోవిందుడా నా కలిమియు నీవే కరుణానిధి

తలపును నీవే ధరణీధర నా నెలవును నీవే నీరజనాభ

తనువును నీవే దామోదర నా మనికియు నీవే మధుసూదన

వినికియు నీవే విఠ్ఠలుడా నా వెనకముందు నీవే విష్ణు దేవుడా

పుట్టుగు నీవే పురుషోత్తమ కొన నట్టనడుము నీవే నారాయణ

ఇట్టే శ్రీవేంకటేశ్వరుడా నాకు నెట్టన గతి ఇంక నీవే నీవే

కలువలు వంటి కన్నులు గల శ్రీరామా! ఈ విశ్వమంతా నీవే, నాకు చెంతననున్నది నీవే. కరుణకు నెలవైన ఓ గోవిందా! నా కులము, నీవే. భూదేవిని ధరించే శ్రీహరీ! నా తలపులు నీవే. కమలనాభా! నీవే నా నెలవు. ఓ దామోదరా! నా శరీరము నీవే. మధుసూదనా! నా నివాసము నీవే. ఓ విఠ్ఠలుడా! నా మాటలు ఆలకించేది నీవే. విష్ణుదేవా! నా ముందు వెనుక రక్షణ నీవే. ఓ పురుషోత్తమా! పుట్టుక నీవే. ఓ నారాయణా! జీవనము, అంతము నీవే. ఓ శ్రీవేంకటేశ్వరా! నాకు పరమగతి ఇంక నీవే!

- తాళ్లపాక అన్నమాచార్యుల వారు