నాద తనుమనిశం శంకరం - త్యాగరాజస్వామి

నాద తనుమనిశం శంకరం నమామి మే మనసా శిరసా

మోదకర నిగమోత్తమ సామవేద సారం వారం వారం

సద్యోజాతాది పంచవక్త్రజ సరిగమపదని వర సప్తస్వర

విద్యాలోలం విదళిత కాలం విమల హృదయ త్యాగరాజపాలం

ప్రణవ నాదమునే తనువుగా గల ఓ శంకరా! నీకు ఎల్లప్పుడూ మనసా శిరసా నమస్కరించుచున్నాను. ఆనందకరమైన వేదములలో శ్రేష్ఠమైన సామవేద సారమైన సంగీతమునకు ఆత్మయైన శంకరా నీకు మరల మరల నమస్కరించుచున్నాను. సద్యోజాత వామదేవ ఈశాన తత్పురుష అఘోర ముఖములనుండి సాంబ పార్వతీ హృదయములనుండి వెలువడిన సప్తస్వరముల సారమైన సంగీత విద్యకు నీవులు లోలుడవు, యముని జయించినవాడవు, సాధు హృదయుడైన త్యాగరాజుని పాలించేవాడవు నీవు. నీకు ఎల్లప్పుడూ మనసా శిరసా నమస్కరించుచున్నాను.

(సాంబుని హృదయము నుండి షడ్జమము (స), శివుని తత్పురుష ముఖము నుండి రిషభము (రి), అఘోర ముఖము నుండి గాంధారము (గ), వామదేవ ముఖము నుండి మధ్యమము (మ), గౌరి హృదయము నుండి పంచమము (ప), శివుని సద్యోజాత ముఖము నుండి దైవతము (ద), ఈశాన ముఖము నుంది నిషాదము (ని) వెలువడినట్లు వేదోక్తము)