భజరే రే మానస శ్రీ రఘువీరం - మైసూరు వాసుదేవాచార్యులవారు

 

భజరే రే మానస శ్రీ రఘువీరం భుక్తి ముక్తి ప్రదం వాసుదేవం

వృజిన విదూరం విశ్వాధారం సుజన మందారం సుందరాకారం

రావణ మర్దనం రక్షిత భువనం రవి శశి నయనం రవిజాతి మదనం

రవిజాది వానర పరివృతం నరవరం రత్న హార పరిశోభిత కంధరం

రవి శశి కుజ బుధ గురు శుక్ర శనీశ్వర రాహుకేతు నేతారం

రాజ కుమారం రామం పవనజాప్త అవనిజా మనోహరం

ఓ మనసా! రఘువీరుడు, భుక్తిని, ముక్తిని ప్రసాదించేవాడు, వాసుదేవుడు అయిన శ్రీరాముని భజింపుము. పాపములను నాశనము చేసేవాడు, విశ్వానికి ఆధారమైన వాడు, సుజనుల పాలిట కల్పవృక్షమైన వాడు, సుందరమైన రూపము కల శ్రీరాముని భజింపుము. రావణుని సంహరించి ముల్లోకాలను రక్షించిన వాడు, సూర్యచంద్రులు నేత్రములుగా కలవాడు, సూర్యవంశమునకు ఆనందం కలిగించిన వాడు, సుగ్రీవాది వానరుల సమూహము పరివారంగా కలవాడు, పురుషశ్రేష్ఠుడు, రత్న హారములతో ప్రకాశించే కంఠము కలవాడు, నవగ్రహములను నియంత్రించేవాడు, దశరథరాజ కుమారుడు, ఆంజనేయునికి ఆప్తుడు, సీతాదేవి మనోహరుడు అయిన రాముని భజింపుము.

ఆభేరి రాగంలో స్వరపరచబడిన ఈ కృతిని సుధా రఘునాథన్ గారు ఆలపించారు.