21, నవంబర్ 2026, శనివారం

సిఱుత నవ్వులవాడు సిన్నెకా - అన్నమాచార్యుల వారి కృతి



సిఱుత నవ్వులవాడు సిన్నెకా వీడు
వెఱపెఱగడు సూడవే సిన్నెకా

పొలసు మేనివాడు బోర వీపువాడు
సెలసు మోరవాడు సిన్నెకా
గొలసుల వంకల కోరలతో బూమి
వెలసినాడు సూడవే సిన్నెకా

మేటి కుఱచవాడు మెడమీది గొడ్డలి
సీటకాలవాడు సిన్నెకా
ఆటదానిబాసి అడవిలో రాకాసి
వేటలాడీ జూడవే సిన్నెకా

బింకపు మోతల పిల్లగోవివాడు
సింక సూపులవాడు సిన్నెకా
కొంకక కలికియై కొసరి కూడె నన్ను
వేంకటేశుడు సూడవే సిన్నెకా 

ఈ అన్నమాచార్యుల దశావతార సంకీర్తనలో శ్రీమహావిష్ణువు ధరించిన పది అవతారాలను ఎంతో చమత్కారంగా, సరళమైన జానపద భాషలో వర్ణించారు. ఓ చిన్నక్కా! చిరునవ్వులు చిందించే అందగాడు, ఎవరికీ భయపడని పరాక్రమశాలి అయిన ఆ శ్రీహరి అద్భుతమైన అవతారాలను చూడు! చేపవలె పొలుసులతో కూడిన శరీరాన్ని ధరించి మత్స్యావతారంలో లోకాలను రక్షించినవాడు ఆయనే. దృఢమైన, విశాలమైన వీపుతో కూర్మావతారమెత్తి మందర పర్వతాన్ని మోసినవాడూ ఆయనే. వరాహముఖాన్ని ధరించి భూమాతను రక్షించినవాడూ, వంకరగా తిరిగిన బలమైన కోరలతో భయంకరమైన నరసింహరూపాన్ని ధరించి హిరణ్యకశిపుని సంహరించినవాడూ ఆయనే. మరొక అవతారంలో పొట్టివాడైన వామనునిగా వచ్చి మూడడుగులతో ముల్లోకాలను ఆక్రమించినవాడు ఆయనే. భుజంపై గొడ్డలిని ధరించి పరశురామునిగా అధర్మాన్ని అణచివేసినవాడూ ఆయనే. సీతాదేవికి ప్రియుడైన శ్రీరామచంద్రునిగా అవతరించి, సీతావియోగంలో అడవులలో సంచరిస్తూ రాక్షసులను సంహరించినవాడూ ఆయనే. బలరామునిగా అవతరించి తన బలపరాక్రమాలను ప్రదర్శించినవాడూ ఆయనే. మధురమైన నాదాలు పలికించే పిల్లనగ్రోవిని చేతబట్టి, చిలిపి చూపులతో గోపికల మనసులను దోచుకున్న శ్రీకృష్ణుడూ ఆయనే. ఈ విధంగా అనేక రూపాలను ధరించి లోకాలను రక్షించిన ఆ పరమాత్మ, చివరికి కలియుగంలో కల్కిగా వచ్చేవాడు శ్రీ వేంకటేశ్వరునిగా వెలసి, ఏమాత్రం సంకోచించకుండా ప్రేమతో నా చెంతకు చేరి నన్ను తనవానిగా చేసుకున్నాడు. ఓ చిన్నక్కా! ఆ స్వామి లీలావిలాసాలను చూడు! ఈ సంకీర్తనలో అన్నమయ్య మత్స్య, కూర్మ, వరాహ, నరసింహ, వామన, పరశురామ, రామ, బలరామ, కృష్ణ, కల్కి అవతారాలను వరుసగా ప్రస్తావించి, వాటన్నింటికీ మూలమైన పరమాత్మ శ్రీ వేంకటేశ్వరుడేనని చాటుతున్నారు. 

సింధుభైరవి రాగంలో స్వరపరచబడిన ఈ అన్నమాచార్యుల వారి కృతిని శోభారాజు గారు ఆలపించారు.  

కామెంట్‌లు లేవు:

కామెంట్‌ను పోస్ట్ చేయండి

తులసీ! జగజ్జననీ! దురితాపహారిణీ! - త్యాగరాజస్వామి కృతి

తులసీ! జగజ్జననీ! దురితాపహారిణీ! నిలవరమగు నీసరి వేల్పులు లేరట బ్రోవుమికను చరణ యుగంబులు నదులకు పరమ వైకుంఠమట సరసీరుహాక్షి నీ మధ్యము సకల సురవాసమ...