ఓ నరసింహా! మా నరసింహా! మాకు మంచి వరములను ప్రసాదించడానికి విలాసముగా రావయ్యా! అందముగా ఆ సింహాచలం కొండను దిగి రావయ్యా! నీ దర్శనం కోసం తపించి, నిన్ను దర్శించి, మా కోరికలను సఫలం చేయుమని నిన్ను స్తుతింతును. ఎంతో వేడ్కతో నిన్ను వేడుకొందును. నీ అనుగ్రహంతో వేడుక చేసుకోవాలని ఆశతో వేచియుందును. నీకు మొక్కులు మొక్కినాను, నిన్ను చేరడానికి కొండలెక్కినాను, అంతుచిక్కని నా అహంకారాన్ని అణదొక్కినాన్ను. నా జీవితంలోని లెక్కలేనన్ని చిక్కులన్నింటినీ ఒక్కసారిగా చక్కదిద్దుమయ్యా! చుక్కలకే రారాజైన చంద్రుడివి, నీవే నాకు దిక్కని నమ్మియుందును. నీ దివ్యస్వరూపాన్ని మెచ్చుకొని, నా మనసునే నీకు ఇచ్చి, నాకు నచ్చిన దేవుడవు నీవేనని నీ శరణుజొచ్చినాను. పచ్చగా వికసించిన మమతానురాగాలనే పుష్పాలుగా గుచ్చి, అందమైన మాలగా చేసి నీ మెడలో వేయడానికి తెచ్చినాము. మా భక్తిని, ప్రేమను, శరణాగతిని స్వీకరించి, మా కోరికలను తీర్చి, కష్టాలను తొలగించి, మమ్ములను అనుగ్రహించుమయ్యా!
సాయికృష్ణ యాచేంద్ర గారు రచించిన ఈ భక్తి గీతాన్ని పుహళేంది గారు స్వరపరచగా ఎస్పీ బాలసుబ్రహ్మణ్యం గారు ఆలపించారు.
కామెంట్‌లు లేవు:
కామెంట్‌ను పోస్ట్ చేయండి