గైకొనవే హారతి గౌరీ పాహి
గౌరీదేవీ! మేము భక్తితో సమర్పించే ఈ మంగళహారతిని స్వీకరించి మమ్మల్ని కాపాడవే తల్లీ! దీనులైన భక్తజనులను ఆదుకొని రక్షించడానికి రావే అమ్మా! సమస్త లోకాలకు అధీశ్వరియైన రాజరాజేశ్వరీ! మమ్మల్ని రక్షించడానికి రావమ్మా! అమ్మా! నా హృదయంలోని విన్నపాన్ని ఆలకించవే! పరమశివునితో అర్ధశరీరాన్ని పంచుకొని అర్ధనారీశ్వరిగా వెలుగొందే తల్లీ! నా ప్రార్థనను కరుణతో వినవమ్మా! పుష్పాలవలె సుకుమారమైన సౌందర్యంతో ప్రకాశించే పూవుబోణీ! మేము సమర్పించే పూజలను స్వీకరించవే! శంభుని ప్రియపత్నివైన శాంభవీ! మాపై దయ చూపించవే! మా మొర ఆలకించడానికి ఇంత ఆలస్యం ఎందుకమ్మా? కర్పూరజ్యోతులతో సమర్పించే మంగళహారతులను స్వీకరించవమ్మా! సకల శుభాలను ప్రసాదించే భద్రాంబికా! మమ్మల్ని ఏలుకొని, మా జీవితాలను కాపాడే బాధ్యత నీకు భారమా తల్లీ? నీ బిడ్డలమైన మమ్మల్ని అనుగ్రహించడానికి ఎందుకమ్మా ఈ ఆలస్యం? మా ప్రార్థనలను మన్నించి, మా పూజలను స్వీకరించి, నీ కరుణాకటాక్షాలతో మమ్మల్ని రక్షించవే జగన్మాతా!
ఈ సాంప్రదాయ మంగళగౌరి హారతి గీతాన్ని గీతాంజలి గారు ఆభేరి రాగంలో ఆలపించారు.
కామెంట్‌లు లేవు:
కామెంట్‌ను పోస్ట్ చేయండి