ఓ స్త్రీలారా! శ్రీ వేంకటేశ్వరస్వామికి ప్రియమైన దేవేరి, సకల సౌభాగ్యాలకు నిలయమైన అలమేలుమంగమ్మకు మంగళహారతులు ఎత్తండి! శ్రీహరి వక్షస్థలంపై వెలుగొందే అమూల్యమైన ఆభరణం ఆమె. ఆమె కంఠంలో స్వామి కట్టిన తాళి సాటిలేని పరమాత్ముని సంసారానికి పరమార్థము. సమస్త సిరిసంపదలకు పుట్టినిల్లు, సౌందర్యానికి మూలం, సకల శుభాలకు ఆధారమైన ఆ అలమేలుమంగమ్మ మెరుపుతీగవలె ప్రకాశించే దివ్యసుందరి.
పరమాత్మతో ఆత్మభావంలో ఏకమై, ఆయన ప్రేమానురాగాలకు అనుగుణంగా మెలిగే ప్రియమైన దేవేరి అలమేలుమంగ. శ్రీహరి ఆనందంగా విహరించే దివ్యనిలయం ఆమె. ఆమె సరసత్వానికి సముద్రం, శాశ్వతమైన బంగారు కొంగుముడి వంటిది. ఆమె కేవలం భౌతిక సంపదలకు అధిదేవత మాత్రమే కాదు; ప్రేమ, ఆనందం, సౌందర్యం, సౌభాగ్యం వంటి అపురూపమైన సంపదలన్నింటికీ నిలయమైన మహాలక్ష్మి.
శ్రీ వేంకటేశ్వరుని పట్టపుదేవేరి అయిన అలమేలుమంగ మన్మథునికి జన్మనిచ్చిన జగన్మాత. ఆ పరమాత్ముని కౌగిలిలో వికసించే అపూర్వమైన సౌందర్యకళ ఆమె. మేలైన పెళ్లి భోజనమువలె స్వామికి కల్యాణం ద్వారా లభించిన నిధి ఆమె. స్వామికి ఇటువైపునా అటువైపునా, ఆయన సన్నిధిలో సర్వత్రా వెలుగొందుతూ, ఆయనతో విడదీయరాని అనుబంధాన్ని కలిగి ఉన్నది అలమేలుమంగమ్మయే.
సురటి రాగంలో స్వరపరచబడిన ఈ అన్నమాచార్యుల కృతిని ఆర్ గణేష్ గారు ఆలపించారు.
కామెంట్‌లు లేవు:
కామెంట్‌ను పోస్ట్ చేయండి