మంగళము గోవిందునకు జయమంగళము గరుడధ్వజునకును
సర్వలోక రక్షకుడైన గోవిందునకు, గరుడుని అధిరోహించిన వానికి జయ మంగళము! సమస్త జీవరాశులలో అంతర్యామిగా వెలసిన వానికి మంగళము! ధర్మమునకు ప్రతిరూపమైన వానికి జయజయ మంగళము!
సృష్టి ఆదికే ఆదియైన దేవునకు, ఎన్నటికీ తన స్వరూపమును కోల్పోని అచ్యుతునకు, నాభియందు పద్మమును కలిగిన వానికి, ఆదికూర్మావతారమున జగత్తును ఆధారముగా నిలిచినవానికి మంగళము! మత్స్యావతారమున వేదములను రక్షించిన వానికి, సదా వేదములు నిర్దేశించిన ధర్మమార్గమునందు విహరించువానికి, బలిచక్రవర్తి గర్వమును అణచిన వామనమూర్తికి, సామవేదాది గానములను ప్రీతితో ఆస్వాదించువానికి మంగళము!
సమస్త పాపములను హరించు హరికి, సర్వమునకు అధిపతియైన పరమేశ్వరునకు, శ్రీమహాలక్ష్మిని వక్షస్థలమున ధరించిన శ్రీధరునకు, కాలమునకు సైతము అంతమును కలిగించగల వానికి, సమస్త పురుషులలో సర్వోత్తముడైన వానికి, అనేకానేక సంసారబంధములను తొలగించువానికి మంగళము! దేవతలు, మునీశ్వరుల స్తోత్రములకు పాత్రుడైనవానికి, దేవాసురగణములలో శ్రేష్ఠునకు, అపారమైన కరుణను ప్రసాదించు కరుణాకరునకు, కాత్యాయనీదేవిచే స్తుతింపబడిన పవిత్రనామములు కలిగినవానికి మంగళము!
పద్మాసనుడైన బ్రహ్మదేవునకు వరములను ప్రసాదించినవానికి, సంసారమనే బురదనుండి జీవులను విముక్తులను చేయువానికి, సమస్త సృష్టికి ఉనికిని ప్రసాదించిన భవునకు, శుభములను కలిగించు శంకరునకు, ఇంద్రియములకు, మనస్సునకు గోచరించని అవ్యక్తునకు, ఆశ్చర్యకరమైన దివ్యస్వరూపమును కలిగినవానికి మంగళము! వేంకటాచలమునకు ప్రభువైన శ్రీ వేంకటేశ్వరునకు, సమస్త విశ్వమును తన స్వరూపముగా కలిగిన విశ్వమూర్తికి, సర్వలోకములను నియమించు ఈశ్వరునకు, పద్మములవంటి శ్రీమహాలక్ష్మి కుంభములవంటి స్తనములపై అలంకరించిన కుంకుమలేపనమునందు ప్రీతిని కలిగిన శ్రీనివాసునకు మంగళము!
ఆనందభైరవి రాగంలో స్వరపరచబడిన ఈ అన్నమాచార్యుల కృతిని గరిమెళ్ల బాలకృష్ణప్రసాద్ గారు ఆలపించారు.
కామెంట్‌లు లేవు:
కామెంట్‌ను పోస్ట్ చేయండి