జయమంగళము నీకు సర్వేశ్వరా - అన్నమాచార్యుల వారి కృతి

జయమంగళము నీకు సర్వేశ్వరా జయమంగళము నీకు జలజవాసినికి

శరణాగతపారిజాతమా పొరినసురలపాలి భూతమా

అరుదయిన సృష్టికి ఆదిమూలమా ఓ హరి నమో పరమపుటాలవాలమా

సకలదేవతాచక్రవర్తి వెకలివై నిండిన విశ్వమూర్తి

అకలంకమైన దయానిధి వికచముఖ నమో విధికి విధి

కొలచినవారల కొంగుపైఁడి ములిగినవారికి మొనవాఁడి

కలిగిన శ్రీవేంకటరాయా మలసి దాసులమైన మాకు విధేయా   

సమస్త లోకములకు అధిపతివైన సర్వేశ్వరా! నీకు జయమంగళము! కమలమునందు నివసించు శ్రీమహాలక్ష్మికి జయమంగళము! శరణు వేడిన భక్తుల కోరికలను కల్పవృక్షమువలె తీర్చు శరణాగత పారిజాతమా! దేవతలను ఆదరించి రక్షించుటకు అవతరించిన దివ్యమూర్తివైనవాడా! అత్యద్భుతమైన ఈ సమస్త సృష్టికి మూలకారణమైన ఓ హరీ! సమస్త శుభములకు, పరమార్థములకు నిలయమైన వాడా! నీకు జయమంగళము! సమస్త దేవతలకు చక్రవర్తివైన వాడా! విశ్వమంతటా వ్యాపించి, ప్రతి అణువునందు నిండియున్న వాడా! ఎటువంటి కల్మషమూ లేని  కరుణాసాగరా! వికసించిన పద్మమువంటి ప్రసన్నముఖము కలిగినవాడా! సృష్టికర్తయైన బ్రహ్మదేవునకు సైతము విధిని నిర్ణయించు విధాతవైనవాడా! నీకు జయమంగళము! నిన్ను భక్తితో కొలిచినవారికి కొంగుబంగారమై కోరిన వరములను ప్రసాదించువాడా! సంసారసాగరమున మునిగినవారిని ఉద్ధరించుటకు ముందుకు వచ్చి రక్షించువాడా! తిరుమలగిరిపై వెలసిన శ్రీ వేంకటరాయా! అలసిసొలసి నీ దాసులమై నిన్ను ఆశ్రయించిన మాకు అనుగ్రహమును ప్రసాదించి, మా ప్రార్థనలకు అనుకూలుడవై నిలిచే దయామయా! నీకు జయమంగళము!   

మధ్యమావతి రాగంలో స్వరపరచబడిన ఈ అన్నమాచార్యుల వారి కృతిని గరిమెళ్ల బాలకృష్ణప్రసాద్ గారు ఆలపించారు.