17, నవంబర్ 2026, మంగళవారం

పదములె చాలు రామా - దేవులపల్లి కృష్ణశాస్త్రి గారి భక్తి గీతం


పదములె చాలు రామా నీ పద ధూళులే పదివేలు

నీ పదమంటిన పాదుకలు మమ్మాదుకొని ఈ జగమేలు

నీ దయ గౌతమి గంగా రామయ నీ దాసులు మునుగంగా
నా బ్రతుకొక నావ దానిని నడిపే తండ్రివి నీవా

కోవెల లోనికి రాలేను నువు కోరిన కానుక తేలేను
నిను గానక నిమిషము మనలేను నువు కనబడితే నిను కనలేను

ఓ శ్రీరామచంద్రా! నీ పాదాల ఆశ్రయం ఒక్కటే నాకు చాలు. నీ పాదాల నుండి వెలువడే పవిత్రమైన ధూళికణాలు నాకు పదివేల వరాలతో సమానం. నీ పాదాలను స్పృశించిన పాదుకలే భరతునికి ఆధారమై, నీ ప్రతినిధులుగా ఈ జగత్తును పరిపాలించగలిగినప్పుడు, నీ పాదాల మహిమను వర్ణించడం ఎవరి తరం! ఓ రామయ్యా! నీ కరుణ గౌతమీ గంగవలె పవిత్రంగా, నిరంతరంగా ప్రవహిస్తోంది. నీ భక్తులందరూ ఆ కరుణాప్రవాహంలో మునిగి పునీతులవుతున్నారు. నా జీవితం ఒక చిన్న నావ వంటిది. ఆ నావను సంసారసాగరంలో సురక్షితంగా నడిపించి, సరైన గమ్యానికి చేర్చే తండ్రివి నీవే. నీ ఆలయంలోనికి ప్రవేశించగల అర్హత నాకు లేదని భావిస్తున్నాను. నీకు సమర్పించడానికి నీవు కోరుకునే విలువైన కానుకలేవీ నా వద్ద లేవు. అయినప్పటికీ నిన్ను తలచుకోకుండా ఒక్క నిమిషం కూడా జీవించలేను. నిన్ను దర్శించాలనే ఆరాటంతో నా హృదయం నిరంతరం పరితపిస్తోంది. కానీ నీవు నా ఎదుట ప్రత్యక్షమైనా, నీ దివ్యస్వరూపాన్ని పూర్తిగా దర్శించి, నీ మహిమను గ్రహించగల శక్తి నాకు లేదు. ఓ రామా! నా అశక్తతను, నిస్సహాయతను, నిరుపేద భక్తిని మన్నించి నన్ను అనుగ్రహించుము. నీకు సమర్పించడానికి నా వద్ద ఉన్నది నిష్కల్మషమైన భక్తి, నీ పాదాలపై అచంచలమైన విశ్వాసం మాత్రమే. దేవులపల్లి కృష్ణశాస్త్రిగారు ఈ గీతంలో శ్రీరాముని పాదమహిమను, ఆయన కరుణపై సంపూర్ణ విశ్వాసాన్ని, భగవంతుని సన్నిధికి చేరాలనే ఆర్తిని, ఆయన దర్శనానికి తాను అర్హుడనో కాదో అనే వినయాన్ని అత్యంత హృద్యంగా వ్యక్తపరిచారు. ముఖ్యంగా నిను గానక నిమిషము మనలేను, నువు కనబడితే నిను కనలేను అనే వాక్యాలలో భగవంతుని విరహాన్ని భరించలేని భక్తుని ఆవేదన, ఆయన ప్రత్యక్షమైనా ఆ దివ్యతను తట్టుకోలేని తన అల్పత్వాన్ని గుర్తించిన వినయం అద్భుతంగా ప్రతిబింబిస్తున్నాయి.  

దేవులపల్లి కృష్ణశాస్త్రి గారి భక్తి గీతాన్ని పాలగుమ్మి విశ్వనాథం గారు స్వరపరచగా ఆకాశవాణి కోసం కేబీకే మోహన్‌రాజు గారు, చిత్తరంజన్ గారు, కోవెల శాంత గారు ఆలపించారు.  

కామెంట్‌లు లేవు:

కామెంట్‌ను పోస్ట్ చేయండి

ఘనాఘన సుందరా - దేవులపల్లి కృష్ణశాస్త్రి భక్తి గీతం

హరి ఓం! హరి ఓం! హరి ఓం! ఘనాఘన సుందరా! కరుణారసమందిరా! అది పిలుపో మేలు కొలుపో నీ పిలుపో మేలు కొలుపో అతి మధుర మధుర మధురమౌ ఓంకారమో! పాండురంగ! పా...