హారతి గైకొను అరమర సేయక - వింజమూరి అనసూయాదేవి గారి మంగళహారతి గీతం

హారతి గైకొను అరమర సేయక

ఆశ్రితపాల! శ్రీరామచంద్ర!

శివుని విల్లు వరచి సీతను పెండ్లాడి

పరశరాముని భంగపరచిన శ్రీరామ

అచ్యుత హరే హరే

అచ్యుత అహల్య శాప పరిహార

సీతామనోహర శ్రీరామచంద్ర

దుష్టుల నేలగూల్చి ధర్మము నిలిపిన

ఓ పురుషోత్తమ సకలగుణాభిరామ 

ఆశ్రితులను కాపాడే శ్రీరామచంద్రా! ఏమాత్రం ఆలస్యం చేయకుండా మేము భక్తితో సమర్పించే ఈ మంగళహారతిని స్వీకరించవయ్యా! శివుని మహాధనుస్సును విరిచి సీతాదేవిని పరిణయమాడిన శ్రీరామా! తన పరాక్రమాన్ని ప్రదర్శించడానికి వచ్చిన పరశురాముని గర్వాన్ని అణచి నీ అసమానమైన శౌర్యాన్ని చాటిన రఘురామా! అచ్యుతా! హరీ! పతనమెరుగని పరమాత్మా! గౌతమ మహర్షి శాపంతో శిలగా మారిన అహల్యను నీ పాదస్పర్శతో శాపవిముక్తురాలిని చేసిన కరుణామయా! సీతాదేవి మనసును ఆనందింపజేసే సీతామనోహరా! దుష్టులను సంహరించి, అధర్మాన్ని అణచివేసి, ధర్మాన్ని నిలబెట్టిన ధర్మస్వరూపా! సమస్త సద్గుణాలకు నిలయమైన సకలగుణాభిరామా! మానవులలో ఉత్తముడవైన పురుషోత్తమా! శ్రీరామచంద్రా! నీ శౌర్యపరాక్రమాలను, ధర్మనిష్ఠను, కరుణను, భక్తరక్షణా వైభవాన్ని స్మరిస్తూ సమర్పించే ఈ మంగళహారతిని ఆనందంగా స్వీకరించి మమ్మల్ని అనుగ్రహించవయ్యా!

వింజమూరి అనసూయాదేవి గారు రచించి కల్యాణి రాగంలో స్వరపరచిన ఈ గీతాన్ని గీతాంజలి గారు ఆలపించారు.