ఓ రఘుపతీ! శ్రీరామచంద్రప్రభూ! దయచేసి అవధరించుము. నీ సన్నిధిలో కొలువుదీరిన వారందరినీ కరుణతో చిత్తగించుము. నీ ఎదురుగా సమస్త దేవతలు, మునులు, భక్తులు నిండుగా కొలువై నీ దివ్యదర్శనాన్ని ఆస్వాదిస్తున్నారు. ఓ రామా! రాఘవా! రామచంద్రా! అయోధ్యానగరానికి అధిపతివైనవాడా! సీతాదేవికి ప్రియపతివైనవాడా! నీ దివ్యసభలో నారదమహర్షి ప్రేమతో నీ మహిమలను గానం చేస్తుండగా, రంభ మొదలైన అప్సరసలు ఆనందంతో నాట్యం చేస్తున్నారు. వానర వీరులందరూ నీ దివ్యముఖాన్ని దర్శిస్తూ భక్తితో శిరస్సులు వంచి నమస్కరిస్తున్నారు. సూర్యవంశంలో జన్మించినవాడా! ఇక్ష్వాకువంశానికి తిలకమై ప్రకాశించేవాడా! మహారాజైన దశరథుని కుమారుడా! విశ్వామిత్ర మహర్షికి ప్రియమైనవాడా! నీ కొలువులో మునులందరూ నిన్ను ఆశీర్వదిస్తున్నారు. నీ ముందర భరతుడు వినయంతో నిలిచి ఉండగా, నీ వెనుక లక్ష్మణుడు వింజామరతో సేవ చేస్తున్నాడు. కౌసల్యాదేవి గర్భమనే రత్నాకరమున ఉద్భవించిన అమూల్యమైన రత్నమా! తిరుమల శ్రీవేంకటాద్రిపై శ్రీనివాసునిగా వెలసినవాడా! నీ దివ్యసభలో ఒకవైపు నీ కుమారులైన కుశలవులు రామాయణ గాథను మధురంగా గానం చేస్తున్నారు. మరొకవైపు దేవతలు, మహర్షులు, వానర ప్రముఖులు నీ వైభవాన్ని కీర్తిస్తున్నారు. ఇంతటి దివ్యమైన పరివారంతో, అపూర్వమైన రాజఠీవితో, అనంతమైన తేజస్సుతో ప్రకాశిస్తున్న నీ మహారాజ వైభవాన్ని మాటలతో వర్ణించడం ఎవరి తరమూ కాదు రామా! నీ కొలువులోని ఈ దివ్యమంగళ దృశ్యాన్ని దర్శించి, నీ అనుగ్రహాన్ని పొందడమే మా పరమభాగ్యము.
ఖమాస్ రాగంలో స్వరపరచబడిన ఈ అన్నమాచార్యుల వారి కృతిని మల్లాది సోదరులు ఆలపించారు.

కామెంట్లు లేవు:
కామెంట్ను పోస్ట్ చేయండి