జయమంగళం నిత్య శుభమంగళం (నాదనామక్రియ రాగం) - త్యాగరాజస్వామి కృతి

జయమంగళం నిత్య శుభమంగళం

మంగళం అవనిసుతానాథునికి మంగళం అరవిందాక్షునికి

మంగళం అద్భుతచారిత్రునికి మంగళం ఆదిదేవునికి

సుందరవదనునికి సుదేహునికి బృందారకగణవంద్యునికి

మందరధరునికి మన మాధవునికి శుభఫలదునికి

ఇనకులమున వెలసిన రామునికి జనకవచనపరిపాలునికి

మనసిజకోటిలావణ్యునికి కనకసింహాసననిలయునికి

మందానిలభోజశయనునికి మందాకినీ వర జనకునికి

మందజనకశతసంకాశునికి మందార రూపునికి హరికి

ఇంద్రాద్యష్టదిగీశనుతునికి చంద్రాదిత్య సునయనునికి

గజేంద్రుని సంరక్షించిన రామ చంద్రునికి జగద్రూపునికి

రాజశేఖరప్రియునికి మౌని రాజరాజపూజితునికి త్యాగ-

రాజ వినుతునికి వర గజరాజాది భక్త వరదునికి

శ్రీరామచంద్రునికి జయమంగళం! నిత్య శుభమంగళం! భూదేవి పుత్రికయైన సీతాదేవికి నాథుడైన శ్రీరామునికి మంగళం! కమలములవంటి కన్నులు కలిగిన వానికి మంగళం! అద్భుతమైన చరిత్ర కలిగినవానికి మంగళం! సమస్త సృష్టికి ఆదికారణమైన ఆదిదేవునికి మంగళం! సుందరమైన ముఖము కలిగినవానికి, దివ్యమైన దేహము కలిగినవానికి, దేవతాగణములచే వందింపబడేవానికి మంగళం! మందర పర్వతాన్ని ధరించినవానికి, మన మాధవునికి, శుభఫలములను ప్రసాదించేవానికి మంగళం! సూర్యవంశములో అవతరించిన శ్రీరామునికి, తండ్రియైన దశరథుని మాటను నిలబెట్టినవానికి, కోటిమంది మన్మథుల సౌందర్యాన్ని మించిన లావణ్యము కలిగినవానికి, బంగారు సింహాసనముపై ఆసీనుడైనవానికి మంగళం! మందగమనముతో వీచే గాలిని ఆహారంగా స్వీకరించే ఆదిశేషునిపై శయనించేవానికి, పవిత్ర గంగానదికి జన్మనిచ్చినవానికి, వందలాది మన్మథుల కాంతితో ప్రకాశించేవానికి, మందార పుష్పమువంటి సుందర స్వరూపము కలిగిన శ్రీహరికి మంగళం! ఇంద్రుడు మొదలైన అష్టదిక్పాలకులచే స్తుతింపబడేవానికి, చంద్రసూర్యులను నేత్రములుగా కలిగినవానికి, గజేంద్రుని ఆపదనుండి రక్షించిన శ్రీరామచంద్రునికి, సమస్త జగత్తునే తన స్వరూపంగా కలిగినవానికి మంగళం! చంద్రశేఖరుడైన పరమశివునికి ప్రియమైనవానికి, మునిశ్రేష్ఠులచే, మహారాజులచే పూజింపబడేవానికి, త్యాగరాజస్వామిచే స్తుతింపబడేవానికి, గజేంద్రుడు మొదలైన భక్తులకు కోరిన వరములను ప్రసాదించేవానికి నిత్య జయమంగళం! శుభమంగళం!

నాదనామక్రియ రాగంలో స్వరపరచబడిన ఈ త్యాగరాజస్వామి కృతిని మంగళంపల్లి బాలమురళీకృష్ణ గారి పర్యవేక్షణలో గాయనీగాయకులు బృందగానంగా ఆలపించారు.