17, నవంబర్ 2026, మంగళవారం

రామ చరణం రామ చరణం - దేవులపల్లి కృష్ణశాస్త్రి గారి భక్తి గీతం



రామ చరణం రామ చరణం రామ చరణం మాకు శరణం
మాకు చాలును మౌని మస్తక భూషణం శ్రీరామచరణం

రాగయై ఈ బ్రతుకు చెడి రాయైన వేళల రామచరణం
మూగయై పెన్ధూళి పడి మ్రోడైన వేళల రామచరణం
ప్రాణమీయగ రామచరణం పటిమనీయగ రామచరణం
మాకు చాలును జరయమరణం రాక బ్రోచే రామచరణం

కోతియై ఈ మనసు నిలకడ కోలుపోతే రామచరణం
సేతువై భవజలధి తారణ హేతువైతే రామచరణం
ఏడుగడ శ్రీ రామచరణం తోడుపడ శ్రీరామచరణం
మాకు చాలును ముక్తిసౌధ ప్రాంగణం శ్రీరామచరణం

నావలో తానుండి మము నట్టేట నడిపే రామచరణం
త్రోవలో కారడవిలో తోడ్తోడ నడిపే రామచరణం
నావయైతే రామచరణం త్రోవయైతే రామచరణం
మాకు చాలు వికుంఠ మందిర తోరణం శ్రీరామచరణం

దారువునకును రాజ్యపూర్వక దర్పమిచ్చే రామచరణం
భీరువునకును అరిని తీర్చే బీరమిచ్చే రామచరణం
ప్రభుతనిచ్చే రామచరణం అభయమిచ్చే రామచరణం
మాకు చాలును మహేంద్ర వైభవ కారణం శ్రీరామచరణం

ఓ శ్రీరామచంద్రా! నీ పాదాలే మాకు శరణు. మునుల శిరస్సులకు ఆభరణాలుగా విరాజిల్లే నీ పవిత్ర పాదాల ఆశ్రయం ఒక్కటే మాకు చాలు. రాగద్వేషాల వల్ల ఈ జీవితం చెడిపోయి, హృదయం రాయివలె కఠినమైనప్పుడు నీ పాదాలే మాకు దిక్కు. మాటలు రాక, నిస్సహాయతతో ధూళిలో పడి, ఎండిన మోడువలె జీవితం నిర్జీవమైనప్పుడు నీ పాదాలే మాకు ఆధారం. జీవించడానికి ప్రాణశక్తిని, కష్టాలను ఎదుర్కోవడానికి ధైర్యసామర్థ్యాలను ప్రసాదించేవి నీ పాదాలే. వృద్ధాప్యము, మరణము అనే సంసారబంధాల నుండి మమ్మల్ని విముక్తులను చేసే నీ పాదాలే మాకు సర్వస్వం.

కోతివలె చంచలమైన మనస్సు నిలకడ కోల్పోయి అటూ ఇటూ పరుగులు తీస్తున్నప్పుడు దానికి స్థిరత్వాన్ని ప్రసాదించేవి నీ పాదాలే. జననమరణాలతో కూడిన ఈ సంసారమనే మహాసముద్రాన్ని దాటించడానికి సేతువుగా నిలిచేవి నీ పాదాలే. మాకు ఏ దిక్కూ తోచని సమయంలో దిక్కుగా, కష్టకాలంలో తోడుగా నిలిచేవి నీ పాదాలే. మోక్షమనే దివ్యభవనంలోకి ప్రవేశించడానికి ప్రాంగణంవలె మార్గాన్ని చూపించే నీ పాదాల ఆశ్రయం ఒక్కటే మాకు చాలు.

జీవితమనే నావలో మాతోపాటు ఉండి, సంసారమనే నట్టేట మమ్మల్ని సురక్షితంగా నడిపించేవి నీ పాదాలే. జీవితయాత్రలో ఎదురయ్యే దుర్గమమైన మార్గాలలోనూ, కారడవులవంటి కష్టసమయాలలోనూ మాకు తోడుగా నడిచేవి నీ పాదాలే. సంసారసాగరాన్ని దాటించడానికి నావగా, జీవితగమ్యాన్ని చేరుకోవడానికి త్రోవగా మారేవి నీ పాదాలే. వైకుంఠమనే పరమపద మందిరానికి మంగళతోరణాలుగా విరాజిల్లే నీ దివ్యపాదాలే మాకు చాలు.

సాధారణమైన దారువుకు సైతం రాజోచితమైన గౌరవాన్ని, వైభవాన్ని ప్రసాదించగల మహిమ నీ పాదాలది. భయపడే బలహీనునికి శత్రువులను ఎదుర్కొనే వీరత్వాన్ని, ధైర్యాన్ని ప్రసాదించేవి నీ పాదాలే. సామాన్యునికి ప్రభుత్వాన్ని, శరణు కోరినవారికి అభయాన్ని అనుగ్రహించేవి నీ పాదాలే. దేవేంద్రుని వైభవానికి సైతం కారణమైన నీ మహిమాన్విత పాదాల ఆశ్రయం ఒక్కటే మాకు చాలు.

దేవులపల్లి కృష్ణశాస్త్రి గారి గీతాన్ని పాలగుమ్మి విశ్వనాథం గారు స్వరపరచగా ఆకాశవాణిలో ఈ పాటను శ్రీరంగం గోపాలరత్నం గారు, వింజమూరి లక్ష్మి గారు ఆలపించారు. పూర్ణచంద్రిక రాగం ఆధారితంగా ఈ గీతం స్వరపరచబడింది.   

కామెంట్‌లు లేవు:

కామెంట్‌ను పోస్ట్ చేయండి

ఘనాఘన సుందరా - దేవులపల్లి కృష్ణశాస్త్రి భక్తి గీతం

హరి ఓం! హరి ఓం! హరి ఓం! ఘనాఘన సుందరా! కరుణారసమందిరా! అది పిలుపో మేలు కొలుపో నీ పిలుపో మేలు కొలుపో అతి మధుర మధుర మధురమౌ ఓంకారమో! పాండురంగ! పా...