హాటకేశ్వర సంరక్ష మాం - ముత్తుస్వామి దీక్షితుల వారి తిరువారూర్ పంచలింగ కృతి

హాటకేశ్వర సంరక్ష మాం తప్తహాటకమయ లింగమూర్తే త్రయాత్మక

పాటలీపాదపమూలప్రకాశ పాతాళ బిలహరి హయాద్యమరనుత

హాటకక్షేత్రనివాస హంసరూప చిద్విలాస

కోటికోటి చిదాభాస గురుగుహమానసోల్లాస

దారుకా వనస్థ తపోధనాత్యుగ్ర తపఃప్రభావ సంభవ మూర్తే

మేరుశృంగ మధ్య స్థిత శ్రీనగర విహార పరాశక్తి సహిత కీర్తే

మారుతినంద్యర్జునాది భరతాచార్యైరవేదిత నర్తన స్ఫూర్తే

చారు స్మిత ముఖాంభోజ శశిధర సరసీరుహ పద విదలిత భక్తార్తే

గౌరీపతే పశుపతే గంగాధర జగత్పతే

శౌరి వినుత భూతపతే శంకర కైలాసపతే

ఓ హాటకేశ్వరా! నన్ను రక్షించుము. కరిగించి శుద్ధిచేసిన బంగారంవలె ప్రకాశించే సువర్ణమయ లింగరూపుడా! సృష్టి, స్థితి, లయములనే మూడు కార్యములకు మూలమైన త్రయాత్మక స్వరూపుడా! కలిగొట్టు వృక్షము మొదట ప్రకాశించేవాడా! పాతాళ బిలముతో సంబంధమున్న పవిత్ర క్షేత్రమున వెలసి, శ్రీహరి, హయగ్రీవుడు మొదలైన దేవతలచే స్తుతింపబడేవాడా! హాటకక్షేత్రమున నివసించేవాడా! పరమహంస స్వరూపుడవై చైతన్యానందముతో విలసిల్లేవాడా! అసంఖ్యాకమైన జీవచైతన్యములలో ప్రతిబింబించే పరమచైతన్య స్వరూపుడా! గురుగుహుని హృదయమును ఆనందింపజేసేవాడా! దారుకావనమున నివసించిన మహాతపస్వుల అత్యంత తీవ్రమైన తపస్సు ప్రభావముతో ఆవిర్భవించిన దివ్యమూర్తీ! మేరు పర్వత శిఖరమధ్యమున నెలకొన్న శ్రీనగరమున పరాశక్తితో కూడి విహరించే మహిమాన్వితుడా! మారుతి, నంది, అర్జునుడు మొదలైనవారికీ, భరతాచార్యునికీ తెలియజేయబడిన దివ్యనాట్య స్ఫూర్తి స్వరూపుడా! మనోహరమైన చిరునవ్వుతో వికసించే పద్మమువంటి ముఖము కలవాడా! శిరస్సున చంద్రకళను ధరించినవాడా! పద్మములవంటి నీ పాదములతో భక్తుల బాధలను తొలగించేవాడా! గౌరీపతీ! సమస్త జీవులకు ప్రభువైన పశుపతీ! పవిత్ర గంగను శిరస్సున ధరించిన గంగాధరా! సమస్త జగత్తులకు అధిపతియైన జగత్పతీ! శ్రీమహావిష్ణువుచే స్తుతింపబడే భూతపతీ! సర్వమంగళకరుడైన శంకరా! కైలాసపతీ! నన్ను అనుగ్రహించి సంరక్షించుము. 

బిలహరి రాగంలో స్వరపర్చబడిన ఈ ముత్తుస్వామి దీక్షితుల వారి తిరువారూర్ పంచలింగ కృతిని రామకృష్ణన్ మూర్తి ఆలపించారు.