ఓ శ్రీకాళహస్తీశ్వరా! నిన్ను ఆశ్రయించిన భక్తజనులను రక్షించేవాడా! వాయులింగరూపంలో వెలసిన పరమేశ్వరా! శిరస్సున చంద్రుని ధరించిన రాజమౌళీ! దయతో నా వద్దకు విచ్చేసి నన్ను కాపాడుము. ఇంద్రుడు, బ్రహ్మ, విష్ణువులకు ప్రాణాధారమైనవాడా! ప్రాణమయకోశంలో అంతర్యామిగా విరాజిల్లేవాడా! వాయువు, ఆకాశము, భూమి, జలము, అగ్ని అనే పంచభూతాల రూపాలలో ప్రకాశించే సదాశివా! జ్ఞానప్రసూనాంబికాదేవి ప్రాణేశ్వరా! భక్తులయందు అపారమైన అభిమానముగలవాడా! దక్షిణ కైలాసంగా ప్రసిద్ధిచెందిన శ్రీకాళహస్తిలో నివసించేవాడా! భక్తుల అభీష్టాలను నెరవేర్చడంలో నేర్పరితనముగల పద్మములవంటి హస్తాలు కలవాడా! దీనులపాలిట కరుణాసాగరా! పుష్పబాణాలను ధరించిన మన్మథుని సంహరించినవాడా! అజ్ఞానాంధకారాన్ని తొలగించి జ్ఞానజ్యోతిని వెలిగించేవాడా! సమస్త జీవరాశులకు అధిపతియైన పశుపతీ! గురుగుహునకు జ్ఞానస్వరూపుడవైనవాడా! సచ్చిదానంద పరిపూర్ణమూర్తీ! సామాజికంగా హీనజాతికి చెందినవాడిగా పరిగణింపబడిన కన్నప్ప అనే కిరాతకుని నిష్కల్మషమైన భక్తికి మెచ్చి, అతని పూజలను స్వీకరించి, అతనికి మోక్షాన్ని ప్రసాదించి కీర్తిగాంచిన కరుణామయా! భక్తుని కులమతాలు, ఆచారవ్యవహారాలకన్నా అతని హృదయంలోని నిష్కపటమైన ప్రేమకే ప్రాధాన్యమిచ్చే భక్తవత్సలా! ఓ శ్రీకాళహస్తీశ్వరా! నీ అనుగ్రహంతో నా అజ్ఞానాన్ని తొలగించి, ఆత్మజ్ఞానాన్ని ప్రసాదించి, నన్ను సంసారబంధాల నుండి ఉద్ధరించి రక్షించుము.
హుసేనీ రాగంలో స్వరపరచబడిన ఈ ముత్తుస్వామి దీక్షితుల వారి కృతిని మల్లాది సోదరులు ఆలపించారు.
కామెంట్‌లు లేవు:
కామెంట్‌ను పోస్ట్ చేయండి