పెళ్లి కాని భావి భారత ప్రధాని

ఈ మధ్యనే మన యువరాజుగారు నలభై ఏళ్ళు పూర్తి చేసుకున్నాడు. రాజకీయంగా తల్లి అండదండలు, వేరే దిక్కు లేని కాంగ్రెస్ పార్టీ బాగా అయ్యగారిని అత్యున్నత పదవికి దగ్గరికి నెడుతున్నాయి. స్వయంగా మన ప్రధానమంత్రిగారే ఎన్నో సార్లు అయ్యగారు తన కుర్చీలో కూచుంటే బాగుంటుంది, ఆయనకు అర్హత ఉంది అని చాలా సార్లు చెప్పి మేడంకి తన ప్రభుభక్తిని చాటుకున్నారు. చాలామంది ఇది ఆయన వినమ్రత అని తప్పుగా అర్థం చేసుకొని ఆయనను సానుభూతితో చూస్తారు కానీ ఆయనకు ఆ ఇద్దరి భజన చెయ్యకపోతే ఒక్క రోజు కూడా గడవదు. అది అసలు విషయం.

ఇక అబ్బాయిగారు, రాజకీయంగా అన్ని ఆలోచించి తన ఇమేజ్ బాగా పెరిగే విధంగా సరైన అడుగులు వేస్తున్నట్టు కనపడుతోంది. గత లోక్ సభ ఎన్నికల్లో ఆయన అభ్యర్థుల ఎంపికలో ముఖ్య పాత్రధారి అన్న విషయం తెలిసిందే. అలాగే ఉత్తరప్రదేశ్లో అడుగంటిన కాంగ్రెస్ వోటుబ్యాంకును పెంచి 18 లోకసభ స్థానాలు గెలవటానికి కష్టపడ్డారు. మాయావతితో  తలపడ్డట్టే ఉండి అవిశ్వాస తీర్మానంలో అక్కయ్య మద్దతు కోసం లోపాయకారి ఒప్పందం చేయించటంలో కూడా అబ్బాయి, మేడం పాత్ర చాలా ఉంది.

రూపం చూసి పడిపోయే భారతీయ ఓటరు అబ్బాయిగారికి పట్టం కడితే ఉబ్బి తబ్బిబ్బయిపోతాడు. ఎందుకంటే మనకు ఆ కుటుంబం తప్ప దిక్కులేదు. అందులో, ప్రతిపక్షం అధ్వాన్న స్థితిలో ఉంది. ప్రస్తుత ప్రధానిగారు వయస్సు మీరుతున్నారు. తల్లిగారేమో నాకు వద్దు ఈ కుర్చీ అని త్యాగ రాణి అయ్యారు. తను ప్రధాని అయితే తన విదేశి గతం కాంగ్రెస్ ను,  తనను రాజకీయంగా దెబ్బతీస్తుంది అని బాగా అర్థం అయ్యి మేడం అబ్బాయిగారిని ముందుకు నెట్టారు. తన తండ్రిలా ఒకేసారి ప్రధాన మంత్రి అవ్వకుండా అబ్బాయిగారు ఒక్కోమెట్టు ఎదుగుతున్నట్టు మనకు సినిమా చూపిస్తున్నారు. ఆయన ఇప్పటికే రెండోసారి ఎంపీ, ఏఐసీసీ ప్రధాన కార్యదర్శి. అలాగే బుందేల్ఖండ్, అమేథీ ప్రాంతాల మనోభావాలను, వెనుకుబాటుతనాన్ని ఉదహరించే పాత్రలో మంచి పావులు కదుపుతున్నారు.

యువతకు మార్గదర్శిగా, వారిని రాజకీయాల్లోకి రావాలని ఉత్తేజపరుస్తూ, అప్పుడప్పుడు కాలేజీలు, స్కూళ్ళకు వెళుతూ తను వారికి ప్రతినిధిగా, ప్రతిబింబంగా ఒక ఇమేజ్ చాలా జాగ్రత్తగా నిర్మిస్తున్నాడు ఈ యువరాజు. పేద ప్రజలతో ఫోటోలు, గ్రామాలకు వెళ్లి గుడిసెల్లో భోజనం చెయ్యటం, వారితో కాసేపు గడిపి ఆ వూరి ప్రజలను సమ్మోహితులను చెయ్యటం ఆయనకు నాయనమ్మ, తండ్రి దగ్గరనుంచి బాగా అబ్బింది. ఈ విద్యలో మన కాంగ్రెస్ నాయకులను మించిన వాళ్లు లేరు.  ఉభయ భాష పరిజ్ఞానము (హిందీ, ఇంగ్లీష్), స్ఫురద్రూపము, అన్నిటికి మించి అత్యంత శక్తివంతమైన పరంపర, పార్టీ ఆయన వెంట ఉన్నాయి. ఆయనకు పార్టీలో ఎదురు లేదు. ఎదురు ఉండే అవకాశము లేదు. గత ఎన్నికల్లో పార్టీకి 206 సీట్లు రావటం ఆయన చలవే అని మీడియా మనల్ని ఇప్పటికే నమ్మించేసాయి. జరిగింది కూడా అదేనేమో.  2014 ఎన్నికల్లో (వీలయితే ఈలోపే) అబ్బాయిగారు ప్రధాని అవ్వటానికి అన్ని విధాలుగా పరిస్థితులను ఏర్పరుస్తున్నారు మేడం. ఆయనలాగా ఆలోచించి ఆయనకు తోడు నీడగా ఉండే రెండోతరం నాయకులు ఇప్పటికే కేంద్ర మంత్రివర్గంలో మంత్రులుగా పని చేస్తున్నారు. పాతనీరు ఇంకొక 2 -3 ఏళ్ళల్లో తెరవెనకకు వెళ్లే అవకాశం ఉంది.

ఆ పార్టీలో గత్యంతరం అయ్యి, ఆ కుటుంబం వద్దు అనుకుంటే తప్ప వేరే వాళ్లకు అగ్రతాంబూలం దక్కే అవకాశం లేదు. కాబట్టి అబ్బాయిగారికి గ్రహాలూ,దారులు అన్ని రేస్ కోర్సు రోడ్ వైపు చూపిస్తున్నట్టే. పార్టీ మంచి పరిస్థితిలోనే ఉంది. ఎన్నికలు బానే గెలుస్తున్నారు, దేశం అంతో ఇంతో ముందుకు వెళ్తోంది, ప్రతిపక్షం దీనావస్థలో ఉంది, రాజకీయ దురంధరులు ఏఐసీసీ కోర్ కమిటీ సభ్యులు, మేడంకు రాజకీయ సలహాదారులు, వ్యాపార అగ్రగాములు ఆమెకు వెన్నంటి ఉన్నారు. ఇవన్ని అబ్బాయిగారి పట్టాభిషేకానికి మంచి శుభసూచకాలు. అదును చూసి భీష్మాచార్యుల్ని రిటైర్ చేయించి ఏ రాష్ట్రపతి పదవో ఇచ్చేస్తే, మన అబ్బాయిగారి రాజ్యాభిషేకం జరపవచ్చు.

ఈ మధ్యనే మన సారథి ధోని కూడా మూడు ముళ్ళు వేసేశాడు. అయ్యా మరి, మీరుకూడా ఆ పనేదో కానిచ్చి మాకు భావి ప్రధాన మంత్రిని, కాంగ్రెస్ పార్టీ అధినేతను ఇవ్వాలి కదా?. ఇస్తే నాయనమ్మ వానప్రస్థానికి వెళ్ళొచ్చు. చెల్లెలి పిల్లకు కూడా ఉన్నారు కానీ ఎంతైనా మీ రక్తం మీదే కదా. తొందరగా మాకు నాయకత్వ వారసత్వాన్ని ఇస్తే మేము ఇప్పటినుంచే వారి భజన, పూజ చేసి "నీవే తప్ప ఇతః పరంబెరుగ సంరక్షించు భద్రాత్మకా" అని గజేంద్రుడు శ్రీ మహావిష్ణువుని వేడుకున్నట్టు వేడుకొని వారి పాదాక్రాన్తులమై ఇంకొన్ని వందల ఏళ్ళు మీ వంశాభివృద్ధికి పాటు పడతాము.

లలితా సహస్ర నామాలు మొదలయ్యేది - 'శ్రీ మాతా శ్రీ మహారాజ్ఞీ' తో. అలా మాకు రాజమాత, పెద్దదిక్కు అయిన మేడం త్వరగా పుత్రుడికి వివాహం చేస్తారని ఆశిస్తూ...

బంద్ ఎందుకు?

ఇటీవల పెట్రో, డీజిల్ ధరల పెంపునకు నిరసనగా భాజపా నేతృత్వంలో ఇవ్వాళ్ల భారత్ బంద్. నిరసన తెలపటానికి వేరే మాధ్యమమేమి లేదా ఈ ప్రజా నాయకులకు?.

ఇది ప్రజానాయకులకు నా బహిరంగ లేఖ:

మీకు దమ్ము, నిజాయితీ ఉంటే:

1. ఇంకో వారం రోజుల్లో అసెంబ్లీ మరియు పార్లమెంటు వర్షాకాలపు సమావేశాలు మొదలవుతాయి. అక్కడ నిలదీయండి. ఈ నిర్ణయాన్ని పూర్తిగా ప్రభుత్వం విశదీకరించేవరకు సభను జరగనీయకండి.సహాయ నిరాకరణ చెయ్యండి సభలో. మీ మీద ప్రభుత్వ మనుగడ చాలా ఆధారపడి ఉంది. అది గుర్తుపెట్టుకొని మీ వ్యూహాన్ని వెయ్యండి.
2. నెలలో ఉపఎన్నికలు ఉన్నాయి అక్కడ ఎండగట్టండి యూపీఏ విధానాలను. పత్రికల్లో రాయండి, నిర్ణయం తీసుకున్న మంత్రులు, ప్రధాన మంత్రి, సోనియా గాంధి గారింటి ముందు నిలబడి నినాదాలు చెయ్యండి, నిరాహార దీక్ష చేపట్టండి.  మీ వాదనలో బలం, నిజాయితీ ఉంటే ప్రభుత్వం దిగి రావాల్సిందే. 

దేనికండి మీరు చేసే బంద్?. ముక్కు పచ్చలారని పసి పాప వైష్ణవిని విజయవాడలో  దారుణంగా, అమానుషంగా చంపి కొలిమిలో తగలబెడితే ఏ ఒక్క నాయకుడికి పట్టలేదు. ఆ చంపిన వాళ్ళను ఎవ్వరు ఏమి చెయ్యలేకపోయారు. పార్లమెంటు దాడిలో నిందితుడైన అఫ్జల్ కు ఇంతవరకు ఉరిశిక్ష పడేట్టు ప్రభుత్వం మీద ఒత్తిడి తీసుకురాలేకపోయారు. ఇదేనా మీలో ఉన్న నిబద్ధత?. ఒకరోజు బంద్ చేస్తే ఎంత మంది చిన్న చితక వ్యాపారం చేసే వాళ్ళు నలిగి నష్ట పోతారో తెలుసా?. ఎంతమంది మీరు తీసుకునే తప్పుడు నిర్ణయాలవల్ల ఒకరోజు ఆదాయం కోల్పోతారో మీకు తెలుసా?.

బంద్ అనేది చట్ట వ్యతిరేకం అని దేశ అత్యున్నత న్యాయస్థానం తీర్పు ఇచ్చి నెట్టి మీద మొట్టికాయలు వేసినా మీకు బుద్ధి రాదు. అక్కడ నిరసనలు తెలిపేది ప్రజలు కాదు. కేవలం మీ పార్టీల నాయకులు, మీకింద పని పాట లేకుండా కూర్చునే చోటా నాయకులు. మీలో సగం మందికి అసలు దేనికి నిరసన తెలుపుతున్నారో కూడా తెలీదు.

బంద్ వల్ల జరిగే నష్టం మీకు తెలియకపోతే తెలుసుకోండి.

1. విద్యార్థులు విద్య సంవత్సరంలో ఒక అమూల్యమైన రోజు.
2. రవాణా వ్యవస్థకు దెబ్బ - బస్సులు, రైళ్ళు, ఆటోల మీద ఆధారపడి రోజు పనులకు వెళ్లే వివిధ తరగతుల వాళ్లు.
3. రోడ్డు పక్కన, రోడ్డు మీద, జన సమ్మర్దమైన మధ్య తరగతి ప్రాంతాల్లో ఉండే చిన్న వ్యాపారులు - కిరాణా, పాలు, పండ్లు, కూరలు, హోటల్స్ - ఇలా ఎన్నో.
4. పెద్ద వ్యాపారాలకు అనుబంధంగా ఆధారపడి ఉన్న సగటు వ్యాపారులు, పని వాళ్ళు, కాంట్రాక్టు ఉద్యోగులు.
5. ప్రభుత్వ కార్యాలయాల్లో పని. అసలే మనము నత్త నడక. మూలిగే నక్క మీద తాటికాయ పడ్డ చందం ఈ బంద్.
6. అదను చూసుకొని కొన్ని ముఖ్యమైన వస్తువుల ధరలను పెంచటం వల్ల ప్రజలకు జరిగే నష్టం, ఇబ్బందులు.

ఎవరండీ ఈ నష్టానికి బాధ్యులు?.

1.  మీరు రైళ్లు, బస్సులు ఆపినందు వల్ల ఒక పనిమీద గమ్యానికి చేరాల్సిన మనిషి పని మీరు చేస్తారా?. ప్రజా జీవితాన్ని సాఫీగా నడిపే బాధ్యత మీలో లేనప్పుడు, వాళ్ళను బాధ పెట్టే హక్కు కూడా మీకు లేదు.  
2. రైల్వే, ఆర్టీసీ ఎమన్నా మీ అమ్మ, నాన్న వ్యక్తిగత ఆస్తా మీ ఇష్టం వచ్చినట్టు తగలబెట్టటానికి?. మీ పార్టీ ఫండ్ నుంచి ఆ నష్టాన్ని పూడుస్తారా?. మీరు చేసే  నష్టం లేకపొతే అవి చాలా సమర్థవంతం గా పనిచేయ్యగల సంస్థలు.
3. ఇంటర్వ్యూ కి వెళ్ళాల్సిన యువకుడికి మీ వల్ల కలిగిన ఇబ్బందివల్ల నష్టాన్నిఎవరు తీరుస్తారు?.  మీ పార్టీ తరపున అతనికి ఉద్యోగం ఇప్పించగలరా?.
4. ప్రాణాల కోసం వేరే ఊళ్లు వెళ్లే రోగుల బాధలు ఎవరు తీరుస్తారు?.  వాళ్ల కోసం మీ పార్టీ వాళ్లు వాహనం ఏర్పాటు చెయ్యగలరా?.
5. సందట్లో సడేమియా అని మోసం చేసే ఆటో వాలాల నుంచి కలిగిన నష్టాన్ని ఎవరు పూడుస్తారు?. పోలీసులు కడతారా ఈ డబ్బులు?.
6. మధ్యాహ్నం రెండుగంటలకు గమ్యం చేరాల్సిన రైలు రాత్రి రెండుగంటలకు చేరితే దాని వల్ల జరిగే అసౌకర్యం ఊహించగలరా?. ఒక 18 ఏళ్ళ అమ్మాయిని మీలో ఎవరైనా అర్థరాత్రి ఇలాంటి పరిస్థితిలో ఇంటికి తీసుకెళ్ళి దింపి వాళ్ల అమ్మ నాన్నలను తృప్తి పరచగలరా?. 
7. మీరు చేసే ధర్నా వల్ల ట్రాఫిక్ జామ్ అయి ఎంత మంది ఇబ్బంది పడతారో ఊహించగలరా?. మిమ్మల్నే ఈ పరిస్థితిలో పెట్టుకొని ఒక్కసారి ఎంత కష్టంగా ఉంటుందో ఒక్క నిమిషం ఆలోచించండి. మీకే గుండెపోటు వచ్చి ఖైరతాబాద్ జంక్షన్లో ట్రాఫిక్ ఆగిపోయి మీకు అత్యవసర సేవ అందకపోతే?. ఊహించండి. 

 మిమ్మల్ని ప్రజలు ఎన్నుకుంది వాళ్ళ సమస్యలను తీర్చాలని కానీ కొత్త సమస్యలను నెలకొకసారి ఇలా సృష్టించటం భావ్యమా?. మీకేంటి చెప్పండి ఏదో ఒక గంట ధర్నా, రాస్తా రోకో లో పాల్గొని వెంటనే మెర్సిడెస్ బెంజ్ ఎక్కి ఇంటికి హాయిగా వెళ్తారు.  పేద, మధ్య తరగతి వాళ్ల సంగతి ఆలోచించండి. మీ రాజకీయ స్వార్థపు నిర్ణయాల వల్ల ఎంత మంది ఎన్ని బాధలు, వెతలు అనుభావిస్తారో?.

ప్లీజ్. ఆపండి ఈ అర్థం పర్థం లేని, అసౌకర్యము, బాధ, నష్టము కలిగించే బందులు.

సీతా కల్యాణ వైభోగమే

మహా వాగ్గేయకారుడు, అపర రామభక్తుడు త్యాగరాజు వేర్వేరు ఉత్సవాల్లో, వేడుకల్లో సీతారాముల వైభవాన్ని వర్ణిస్తూ రాసిన కీర్తనలు ఉత్సవ సాంప్రదాయ కీర్తనలుగా ప్రసిద్ధి చెందాయి. నిత్య నైమిత్తిక సేవల్లో మేలు కొలుపు, మంగళ స్నానాది శౌచములు, ఆరగింపులు, ఆరతులు, ఊయల, శయనములతో కూడిన షోడశోపచారములు ఈ కీర్తనలకు మూలం. ఆ దివ్య దంపతులు సపరివారసమేతంగా పొందే ఈ సేవలను త్యాగరాజు కన్నులకు కట్టినట్టుగా భక్తితో రమణీయంగా రచించాడు. చిత్తూర్ నాగయ్య గారి త్యాగయ్య చిత్రంలో మరియు కెవి సోమయాజులు గారి త్యాగయ్య చిత్రంలో ఈ వైభవాన్ని అనుభూతి, భక్తి తగ్గకుండా చూపించారు, వినిపించారు. ఆ ఉత్సవ సాంప్రదాయ కృతుల్లో ప్రతిది మన సమాజంలో జరిగే దైవిక ఉత్సవాల్లో భక్తుల నోట మంచి ప్రాచుర్యాన్ని పొందాయి. అందులో ఒకటి సీతారాముల కళ్యాణంలో రాముల వారి గుణగణాలను వర్ణించే ఈ క్రింది కృతి. శంకరాభరణం రాగం ఖండచాపు తాళంలో స్వరపరచబడింది.  డాక్టర్ మంగళంపల్లి బాలమురళీకృష్ణగారు ఈ కృతితో పాటు మిగతా ఉత్సవ సాంప్రదాయ కృతులను కూడా కమనీయంగా పాడి బహుళ ప్రాచుర్యంలోకి తెచ్చారు.

పల్లవి:

సీతా కళ్యాణ వైభోగమే రామా కళ్యాణ వైభోగమే

చరణాలు:

1 . పవనజ స్తుతి పాత్ర పావన చరిత్ర రవిసోమ వరనేత్ర రమణీయ గాత్ర |  సీతా కళ్యాణ |

తాత్పర్యము: వాయుదేవుని పుత్రుడైన హనుమంతునిచే స్తుతించబడిన పావనమైన చరిత్ర గలిగిన వాడు, సూర్య చంద్రులను కన్నులుగా కలవాడు, సుందరమైన శరీరము కలవాడు ఆ రాముడు.

2. భక్తజన పరిపాల భరిత శరజాల భుక్తిముక్తిదలీల భూదేవ పాల |  సీతా కళ్యాణ |

తాత్పర్యము: భక్తులను పాలించే కల్పతరువు, శస్త్రాలను ధరించిన వాడు, భుక్తి (జీవనాధారాలైన వృత్తి, భోజనము), ముక్తి ప్రసాదించేవాడు, భూమిని పాలించేవాడు, సీతాపతి ఆ రాముడు. 

3. పామరాసుర భీమ పరిపూర్ణ కామ శ్యామ జగదభిరామ సాకేతధామ |  సీతా కళ్యాణ |

తాత్పర్యము: అజ్ఞానాన్ని, అసురులను నాశనం చేసేవాడు, భక్తుల కామ్యఫలదాయకుడు, నీలమేఘ శరీరుడు, సకల లోకములలోకెల్లా అందమైన వాడు,  సాకేతపురాన్ని పాలించిన వాడు ఆ రాముడు.

4. సర్వలోకాధార సమరైకవీర గర్వమానస దూర కనకాంగ ధీర  |  సీతా కళ్యాణ |

తాత్పర్యము: ఈ జగత్తు అంతటికి ఆధారమైన వాడు, యుద్ధంలో ఎదురులేని వీరుడు,  గర్వానికి దూరంగా ఉండే వాడు, స్వర్ణకాంతితో మెరిసిపోయే ధీరుడు ఆ రాముడు.

5. నిగమాగమ విహార నిరుపమ శరీర నగధరాఘవితార నతలోకాధార |  సీతా కళ్యాణ |

తాత్పర్యము: వేదవేదాంగాలు, శాస్త్ర పురాణాలలో వర్ణింపబడి, స్తుతిన్చబడి వాటిలో విహరించేవాడు, అసమానమైన శరీరం కలవాడు,  సమస్త ఆభరణ భూషితుడు, పాపశమనుడు,  భక్తలోకానికి ఆధారుడు ఆ రాముడు.

6. పరమేశనుత కీర్త భవజలధి పోత తరణి కుల సంజాత త్యాగరాజనుత |  సీతా కళ్యాణ |

తాత్పర్యము: శంకరునిచే స్తుతించబడిన వాడు, సంసార సాగరాన్ని దాటించేవాడు,  సూర్యవంశంలో జన్మించిన వాడు, త్యాగరాజుచే నుతించబడిన వాడు ఆ రాముడు.

సూరీడికి నమస్సుమాంజలి

ఉదయం యోగాలో సూర్యనమస్కారాలు చేసెటప్పుడు వచ్చిన కవితావేశంలో రాసిన సూర్య నమస్కారం:

సిత్రాల సిత్రాల సూరీడు పొద్దున్నె నిద్దుర లేపాడు
వేడి వేడి బాణాల సూరీడు రేతిరిని దాటి వచ్చాడు
దండాలు దండాలు సూరీడు నీ వెలుగుతో బతుకుల కాపాడు
ఏడు గుర్రాల సూరీడు మా భూదేవిని సల్లంగా నువు సూడు
ఎర్రని పండనుకొని సూరీడు నిను హనుమయ్య మింగగ వచ్చాడు
ఎండ మండించిన సూరీడు మేఘాలని వర్షంగా పంపాడు
నువ్వు రాకుంటే సూరీడు మాకు బువ్వ బతుకు లేదు సూరీడు
నువ్వు రాకుంటే సూరీడు చెట్టూ చేమా ఏడ్చేను సూరీడు
చంద్రునితో కలిసి సూరీడు ఈ పుడమిని ఏలూ సూరీడు
ప్రత్యక్ష దైవము సూరీడు నీ పాదాల మొక్కుతా సూరీడు
సిత్రాల సిత్రాల సూరీడు మా ఆరోగ్యదాత ఈ సూరీడు

ఝుమ్మంది నాదం - చిత్ర సమీక్ష

చిత్రం: ఝుమ్మంది నాదం 
విడుదల: జూలై 2, 2010
తారాగణం: మంచు మనోజ్, తాపసి, మోహన్ బాబు, సుమన్, బ్రహ్మానందం, ఎమ్మెస్ నారాయణ, తనికెళ్ళ భరణి తదితరులు.
దర్సకత్వం: రాఘవేంద్ర రావు
నిర్మాత: మంచు లక్ష్మీ ప్రసన్న
సంగీత దర్శకులు: ఎం ఎం కీరవాణి
నేపథ్య గాయకులు: బాలసుబ్రహ్మణ్యం, సునీత, గీతా మాధురి, కృష్ణ చైతన్య, చైత్ర, అనూజ్, దీపు తదితరులు. 

ఝుమ్మందినాదం చిత్రానికి కావలిసిన పరికరాలు - అనుభవఙ్ఞుడైన దర్శకులు రాఘవేంద్రులు, సంగీత వాణి కీరవాణి, ప్రతిభ ఉన్న నటులు మనోజ్, మోహన్ బాబు, బ్రహ్మానందం, సుమన్, అందమైన నూతన కథానయిక తాప్సి - అన్నీ ఉన్నాయి కానీ నాకు మళ్లీ రాఘవేంద్రరావు పైత్యం ఎక్కువ అనిపించింది.

తెలుగు సాంప్రదాయం అని మంచి సంగీతంతో, కోనసీమ, అరకు సౌందర్యాలతో, భిన్నమైన పాత్రలో మోహన్ బాబు, ఎమ్మెస్, బ్రహ్మి, ధర్మవరపుల హాస్యంతో మొదలయ్యిన మొదటి భాగం రెండో భాగానికి వచ్చేసరికి బూతులు, ద్వంద్వార్థాలు, రొటీన్ సంగీతం (పెళ్లి మరియు సంక్రాంతి పాటలు), మసాలా - రాఘవేంద్రరావు చిత్రాల్లో కనిపించే యాపిల్స్, రంగులు, బుడగలు, అంగాంగ ప్రదర్శన, కొబ్బరి చిప్పలు గాడిద గుడ్డులా తయారయ్యింది చివరకు. పెళ్లి తంతుల మీద పాటలు చూసి చూసి, రంగుల పాటలు చూసి చూసి ఇవంటే కొంత మొహం ఎత్తింది నాకు.

తెలుగు రాని అమ్మాయిని తీసుకుని తెలుగుదనం మీద చిత్రం తీయటం ఎందుకో అర్థం కాలేదు. ఏమన్నా అంటే ఆ అమ్మాయి పాత్ర ఎన్నారై అనొచ్చు. కాని ఆ అమ్మాయి అంతరించిపోతున్న తెలుగుదనం, సాంప్రదాయ సంగీతం మీద ప్రాజెక్టు చేయటానికి భారతదేశానికి వస్తుంది. మరి అదేంటో - కట్టు, బొట్టు, నడవడిలో ఎక్కడా తెలుగుదనం కనిపించదు. మొత్తం మీద - సంగీతం (కొన్ని పాటలు), కొంత హాస్యం, మంచు మనోజ్ అభినయం బాగున్నాయి. వయస్సున్న పాత్రలో కలెక్షన్ కింగ్ మోహన్ బాబు గారు బానే చేసారు. చిత్రానికి బలం చేకూర్చాల్సిన నాయిక అందం గుదిబండ అయ్యిందేమో అనిపించింది.

కొత్త గాయకులకు అవకాశం ఇచ్చిన కీరవాణి గారికి అభినందనలు. బాలు, బృందం పాడిన శాస్త్రీయ సంగీత ప్రధాన తొలిపాట, బాలు, గీతా మాధురిల యుగళగీతం 'లాలి పాడుతున్నది ', సునీత, కృష్ణచైతన్యల 'ఎంత ఎంత'  అనే శృంగార యుగళగీతం, అలాగే అనూజ్, చైత్రల జానపద/ఆదివాసి యుగళ గీతం 'ఏం సక్కగున్నావ్ రా'  వీనుల విందు. చిత్రం ముగింపులో ఉన్న పాట హైలైట్. చంద్రబోస్ గారు రాసిన 'దేశమంటే మతం కాదోయ్' దేశహిత సందేశం ఉన్న ఈ గీతం చాలా బాగుంది.

వస్త్ర ధారణ, మేకప్, నాయిక, మితిమీరిన శృంగారం - వీటిని కొంచెం జాగ్రత్తగా ఎంపిక  చేస్తే చాలా బాగుండేది చిత్రం.  మొత్తం మీద కీరవాణి గారి సంగీతం ఆహ్లాదకరం, శ్రవణానందకరం. మంచు మనోజ్ కు మంచి భవిష్యత్తు ఉంది. 5 లో 2 -1 /2 మార్కులు ఇస్తాను నేను. ఈ మొత్తం మార్కులు సంగీతానికే.

ముందుకు సాగటం ఎలా - ఉత్తేజ పరిచే గీతం ఒకటి

మడిసి అన్నాక కష్టాలు రాకుండా ఉంటాయా చెప్పండి మాస్టారు!. శోకం, మానసిక వ్యధ, ఆందోళన, కన్నీళ్లు ఇవన్ని అందరికి ఎప్పుడోకప్పుడు వచ్చేవే. మాకు ఇవేవి లేవండి మేము వీటికి అతీతులము అంటే నాకు చెప్పండి వాళ్ళని కలిసి పాదాభివందనం చేస్తాను ఎందుకంటే వాళ్ళు శ్రీకృష్ణ పరమాత్మ చెప్పిన "శీతోష్ణః సమదుఃఖేషు..." శ్లోకానికి ఉదాహరణలు, యోగులు. మనం యోగులము కాదులెండి కానీ, మనకు కూడా వీటిని దాటటానికి ఆ పరమాత్మ కొన్ని మార్గాలు ఇచ్చాడు.

కష్టాలు కష్టాల లాగ తీసుకోవద్దు, ధైర్యంగా ఉండాలి, కష్టాలు, సుఖాలు పరమాత్మ మాయ వగైరా వగైరా ఇలాంటివి ఏమి నేను చెప్పను ఎందుకంటే అవి ఆ పరిస్థితిలో ఉన్న వాళ్లకు రుచించవు, సరియైనదిగా అనిపించదు. నవ్వేసి సమస్య లేదు అనుకోవటం, ఎల్లప్పుడూ మానసిక నిగ్రహం, సంతులనలో ఉండటం చాలా తక్కువ మందికి సాధ్యం. కానీ, ప్రపంచంలో మనం ఎదుర్కుంటున్న పరిస్థితి ఎప్పుడోకప్పుడు ఎవరో ఇంకొకరు ఎదుర్కుని అధిగమించగలిగి ఉంటారు. మనం మొదలు కాదు, చివర కాదు. కనుక, తప్పకుండా పరిష్కారం ఉంటుంది.

మరి ఏమిటి చెయ్యటం?. ఈ పాట ఒక మంచి ఉదాహరణ ఏమి చెయ్యొచ్చో అన్నదానికి. పాజిటివ్ ఆలోచనలతో పోరాడమని దీని సారాంశం. ఎందుకంటే అనుకూల (పాజిటివ్) ఆలోచనలు వ్యతిరేక (నెగటివ్)  ఆలోచనల కన్నా చాలా బలమైనవి. కొన్ని అనుకూల ఆలోచనలతో ఒక వ్యతిరేక ఆలోచనను పోరాడటం దీనిలో మొదటి మెట్టు. రెండోది - ఉన్న పరిస్థితిలోంచి బయటకు ఎవ్వరు లాగలేరు. అది మనం అడుగు వేస్తె తప్ప అవ్వని పని. అడుగు వెయ్యటానికి, ఆలోచనలు రావటానికి పక్కనవాళ్ళు సాయపడగలరు.

ఆశ వదలకుండా ఒక అడుగు అనుకూల ఆలోచనతో వేస్తె అక్కడ తప్పకుండా మనకున్న సమస్యకు పరిష్కారం దొరుకుతుంది. అందుకనే మన పెద్దలు అన్నారు - సమస్య ఉంటే పది మందితో చెప్పుకోవాలిరా అని. దాని అర్థం సానుభూతి పొందటానికి కాదు - కష్టంలో ఉన్న మనిషి యొక్క మానసిక పరిస్థితి అడుగు ముందుకు వేసే ఆలోచనలను రానివ్వకపోవచ్చు. అలాంటప్పుడు నలుగురితో కలిసి, మాట్లాడితే - కొత్త ఆలోచనలు మన మనస్సులోకి వెళ్లే అవకాశం ఎక్కువ. అలాగే, నలుగురుతో మాట్లాడితే మనకున్న సమస్యకన్నా ఇంకా పెద్ద సమస్య కనిపించొచ్చు. అప్పుడు మన సమస్యను 'ఆ ఇది చాలా చిన్నది, నన్నేమి చెయ్యలేదు, పాపం వాళ్ళు ఇంకా ఎంత పెద్ద భవసాగరంలో ఉన్నారో' అని కొట్టి పారేసే అవకాశం వస్తుంది. అంటే ఏమిటి?. - ఒక అనుకూల ఆలోచన మొదలయ్యినట్టే కదా?. అది చాలు మీ సమస్యను పూర్తిగా అధిగమించటానికి.

సాధనాలు ఏమిటి?

1. ముందడుగు వేసే ధైర్యం - ఇక్కడ మనకు ఆ పరిస్థితిలో ధైర్యం ఉండకపోవచ్చు. అలాంటప్పుడు మన చుట్టూ ఉన్న వ్యవస్థను ఆశ్రయించాలి - కుటుంబం, బంధువులు, ఆత్మీయులు, స్నేహితులు, గురువులు, తోటి పనివారు, పుస్తకాలు.  కానీ మొట్టమొదటి అడుగు మనమే వెయ్యాలి. పక్కవాళ్ళు వేయించారు అని అనిపించినా అది మన మనస్సు చెప్పనిదే జరగదు.
2. పరిష్కారం ఉంది అనే నమ్మకం, భగవంతుడు ఎప్పటికీ మనల్ని ఇలానే ఉంచడు అన్న విశ్వాసం.

పాటను, అర్థాన్ని ఆస్వాదించండి :-) . యూట్యూబ్లో వీడియో లింక్. శ్రీశ్రీ గారు విప్లవ రచయిత మాత్రమే అని చాలామంది అపోహ. ఆయన కొన్ని అద్భుతమైన సామాజిక, భక్తీ గీతాలు కూడా రాసారు. రవి కాంచని చోట కవి కాంచును అనేది ఆయన పట్ల ముమ్మాటికీ నిజం.

చిత్రం: వెలుగునీడలు
గాయకులు: ఘంటసాల వేంకటేశ్వరరావు
సంగీతం: పెండ్యాల నాగేశ్వరరావు
నటీనటులు: సావిత్రి, అక్కినేని నాగేశ్వరరావు
గేయ రచయితా: శ్రీశ్రీ (శ్రీరంగం శ్రీనివాసరావు)

కల కానిది విలువైనది బ్రతుకు కన్నీటి ధారలలోనె బలి చేయకు
కల కానిది విలువైనది బ్రతుకు కన్నీటి ధారలలోనె బలి చేయకు

గాలి వీచి పూవుల తీగ నేల వాలి పోగ
గాలి వీచి పూవుల తీగ నేల వాలి పోగ
జాలి వీడి అటులేగాని వదులవైతువా
చేర దీసి నీరు పోసి చిగురించ నీయవా

|| కల కానిది విలువైనది ||

అలముకున్న చీకటిలోనె అలమటించనేల
అలముకున్న చీకటిలోనె అలమటించనేల
కలతలకే లొంగి పోయి కలువరించనేల
సాహసమను జ్యోతిని చేకొని సాగిపో

|| కల కానిది విలువైనది ||

అగాధమౌ జలనిధిలోన ఆణిముత్యమున్నటులే
శోకాల మరుగున దాగి శుఖమున్నదిలే
అగాధమౌ జలనిధిలోన ఆణిముత్యమున్నటులే
శోకాల మరుగున దాగి సుఖమున్నదిలే
ఏది తనంత తానై నీ దరికి రాదు
శోధించి సాధించాలి అదియే ధీర గుణం

|| కల కానిది విలువైనది ||

ఆరోగ్యకరమైన ప్రత్యామ్నాయాలు

డాక్టర్ మంతెన సత్యనారాయణరాజు గారి ప్రకృతి జీవన విధానం/వైద్య సలహాల పుణ్యమా అని ఆంధ్రులు తినే తిండి లో ఎంత చెడు, చేదు ఉందో తెలుస్తోంది. ఆయన పుస్తకాలు బజారులో దొరుకుతున్నాయి. మీకు వీలైనప్పుడు కొనుక్కోండి. లేదా కేబుల్ టీవిలో చానల్స్ తిప్పుతూ ఉంటే మీకు ఆయన తప్పకుండ ఏదో ఒక ఛానెల్లో కనిపిస్తారు. కొన్నాళ్ళు శ్రద్ధగా ఆయన కార్యక్రమాలు చూస్తే మీకు వివరాలు అరటిపండు ఒలిచి చేతిలో పెట్టినట్టు చెబుతారు. కొన్ని ముఖ్యాంశాలు.

౧.మనం తినే ఆహారంలో  ఉప్పు అన్నిటికన్నా ప్రమాదకరమైన వస్తువు. మీకు వీలయితే ఉప్పును పూర్తిగా మానేయ్యండి. మరి శరీరానికి ఉప్పు ఎలా?. - ప్రకృతి మనకు ఇచ్చే ప్రతి కూరగాయలో ఉప్పు మన శరీరానికి తగినంత ఉంటుంది. అందుకని ఇంకా వేరేగా ఉప్పు వెయ్యక్కర్లేదు వంటల్లో. అబ్బో ఎలా అండీ తినటం. కష్టమే. ఉప్పు మానేసిన వాళ్ళలో ఫలితాలు చూసాను. చక్కర కన్నా ఉప్పు మధుమేహ వ్యాధిగ్రస్తులకు శాపం. ఎందుకు ఎలా అనేది ఆయన పుస్తకాల్లో వివరంగా ఉంది.
౨. రెండో ప్రేమాదకరమైన ఆహారం పాలిష్ పట్టిన బియ్యంతో వండిన అన్నం, పొట్టు తీసిన గోధుమలతో పట్టిన గోధుమ పిండి. ఆంధ్ర ప్రదేశ్ లో మధుమేహరోగులు దేశమంతటి కన్నా ఉండటానికి కారణం ఈ పాలిష్ పట్టిన ధాన్యంతో చేసిన ఆహారం. కాబట్టి తప్పకుండ పొట్టు తీయని ముడి బియ్యపు అన్నము, పొట్టుతో కూడిన గోధుమ పిండితో చేసిన రొట్టెలు/పుల్కాలు తినండి.
౩. మూడో ప్రమాదకరమైన వస్తువు వంట నూనె. శరీరంలోకి వంటనూనె ద్వారా వెళ్లే కొవ్వు అస్సలు అవసరంలేదుట. ప్రకృతి మనకు ఇచిన పప్పులు, గింజలు (వేరుశనగ, నువ్వులు వగైరా), కొబ్బరి లాంటివి మితంగా తీసుకుంటే చాలుట. కాబట్టి వేపుళ్ళు, నూనెలో ముంచిన కూరలు మానటమే కాదు, అసలు నూనె వెయ్యకుండా కూరలు చేసుకుంటే మంచిది.

పై మూడు పాటిస్తే చాలా మటుకు శరీరం బాగుపడుతుంది. ఎందుకంటే - ఉప్పులేకుండా, నూనెలేకుండా తినాలి అంటే ఫస్ట్ మానెయ్యాల్సింది ఊరగాయలు. దానితో సగం రోగాలు అదుపులోకి వస్తాయి.

వేరే చిట్కాలు:

౧. ఎప్పుడైనా తీపి తినాలి అనిపిస్తే పంచదార, బెల్లం కాకుండా తేనె, ఖర్జూరపు పొడి ప్రత్యామ్నాయాలుగా వాడండి.
౨. మొలకలు, పండ్లు, ఉడకబెట్టిన కూరలు ఆహారంలో ముఖ్యభాగం కావాలి.
౩. నూనె వెయ్యకుండా పెసరట్టు, పొట్టు మినపపప్పుతో చేసిన ఆవిరి కుడుములు లాంటివి ఉదయం ఫలహారంలో తినొచ్చు. ఇడ్లి/దోస/పూరి లాంటివాటితో పైన '౨' లో చెప్పిన సమస్యలే. కాబట్టి ప్రకృతి ప్రసాదించిన పండ్లు, మొలకలు, కూరగాయలు తింటే మంచిది.
౪. నూనె వెయ్యని పుల్కాలు, ముడి బియ్యంతో అన్నం - ఇవి ముఖ్య ఆహారంలో  (మధ్యాహ్నం, సాయంత్రం) మితంగా తీసుకోవచ్చు.
౫. సాయంకాలం భోజనం వీలైనంత త్వరగా తినండి.
౬. మంచి నీళ్ళు బాగా తాగండి. ఉదయం లేవగానే ౧-౨ లీటర్లు, ప్రతి భోజనం తర్వాత ఒక గంటకి, భోజనానికి ఒక గంటముందు  మళ్ళీ తాగండి.
౭, ద్రాక్ష, ఆపిల్ లాంటి పళ్ళు తినేటప్పుడు బాగా కడిగి శుభ్రం చేసి తినండి ఎందుకంటే వీటిమీద చాలా క్రిమిసంహారకాలు ఉంటాయి. అలాగే కాబేజీ, కాలీఫ్లవర్ లాంటి కూరగాయలను బాగా కడిగి, పూర్తిగా ఉడికిన తర్వాతే తినాలి.
౮. పులుపుకు ప్రత్యామ్నాయంగా నిమ్మ రసం, కాలాన్ని బట్టి దొరికే ఉసిరి, చింత కాయలు, మామిడికాయలు, దానిమ్మ గింజలు వాడుకోవచ్చు.
౯. కారం కావాలంటే ఎండుకారం/ఎందు మిరపకాయలకు బదులుగా పాచి మిరపకాయ వాడండి.

ఇవండీ నాకు తెలిసిన సూత్రాలు.మీరు పాటించి చూడండి. ఆరోగ్యకరమైన ఆహారం తింటే ఆరోగ్యకరమైన ఆలోచనలు వస్తాయిట.  ఆహారానికి తోడు మంచి వ్యాయామం (ప్రాణాయామం, యోగాసనాలు) చేస్తే మీరు రెండు వందల ఏళ్ళు అయిన బతకొచ్చు అని రాజు గారి సలహా. మీరు పాటిస్తున్నారా ప్రసాద్ గారు అంటే ప్రయత్నిస్తున్నాను, ఫలితాలు మెల్లగా కనిపిస్తున్నాయి అని మాత్రం చెప్పగలను. బాగా పాటిస్తున్న వాళ్ళలో ఫలితాలు అద్భుతంగా ఉన్నాయి. అది సత్యం.