నర్తనశాల చిత్రంలో ఎన్టీఆర్ బృహన్నల పాత్ర

అభినయంలో నవరసాలను, స్త్రీపురుష హావభావాలను ఏకకాలంలో ఎలా కనబరచాలో అన్నదానికి పాఠ్యాంశంగా చెప్పుకునే సన్నివేశం 1963లో విడుదలైన రాజ్యం పిక్చర్స్ వారి నర్తనశాల చిత్రంలో బృహన్నల-ఉత్తర మధ్య చిత్రీకరించబడిన సలలితరాగసుధారససారం అన్న గీతం. 

ఎన్టీఆర్ మేటి హీరోగా ఉన్నప్పుడు బృహన్నల లాంటి విభిన్నమైన, క్లిష్టమైన పాత్ర ఒప్పుకునే సాహసం చేశారు చూడండి, దానికి ఆయనకు విశ్వవిఖ్యాత నటసార్వభౌమ అన్నది బిరుదు పూర్తిగా సముచితం. అనన్యపరాక్రమశూరుడు, పౌరుషానికి మారుపేరైన వీరాధివీరుడు అర్జునుని పాత్ర నుండి పేడి బృహన్నల పాత్రలోకి నందమూర్తి తారకరామారావు గారు ఎలా రూపాంతరం చెంది పాత్రలో పరకాయప్రవేశం చేశారో ఈ పాట, చిత్రంలో మిగిలిన సన్నివేశాలలో కూడా బృహన్నలగా ఆయన నటన చూస్తే అర్థమవుతుంది. కాటుక పెట్టుకుని, స్త్రీలు ధరించే కొన్ని ఆభరణాలు ధరించే, వీరత్వానికి సూచికగా ఉండే చంద్రవంకను తిలకంగా ధరించి, వస్త్రధారణ స్త్రీపురుషుల ఆహార్యానికి అనువుగా ఎంచుకోవటం ఒక వైపు, నడకలో, కంటిచూపులోని భావనల్లో వీర శృంగార రసాలు, నాట్యశాస్త్రంలోని మెలకువలు ఒకపక్క గొప్ప శాస్త్రీయ నృత్య విదుషీమణి అయిన ఎల్ విజయలక్ష్మి గారి పక్కన పూర్తిగా దీటుగా, సముచితంగా నటించగలగటం...నందమూరి వారి పట్టుదలకు, కౌశలానికి చుక్కాని. ఇంతే కాదు సముద్రాల వారి సాహిత్యం, సుసర్ల దక్షిణామూర్తి గారి సంగీతం, మంగళంపల్లి వారి గాత్రం...ఇవన్నీ కూడా మేళవించబడిన పాట ఇది, దానికి పూర్తి న్యాయం చేయాలంటే ఎన్టీఆర్ ఎంతటి సాధన చేసుంటారో ఊహించండి. 

ఈరోజు హీరోలకు కండలు పెంచి, బూతులు మాట్లాడుతూ, ఒక వందమందిని చితకతన్ని, స్కార్పియోలను, ఫార్చూనర్లను గాల్లోకి ఎగిరేసే సూడోవీరలక్షణాల మీద దృష్టి. బృహన్నల లాంటి పాత్రలు వేయగలిగితే నటనలోని నిజమైన క్లిష్టత అర్థమవుతుంది. నటన అంటే పాత్రకు, సన్నివేశానికి తగినట్లుగా పరకాయప్రవేశం చేయగలగటం. నిజంగా అది తపస్సే. నేటి నటుల్లో ప్రతిభకు కొదవలేదు, వైవిధ్యమైన పాత్రలను ఎంచుకోగలగటం, వాటిని ప్రజలు ఆదరించేలా నటించటం, ఆటుపోట్లను తట్టుకోవటం...ఇవి పెద్దగా లేవు. అందుకే ఇప్పటికీ హీరోలుగా నటనకు ఎన్టీఅర్, ఏఎన్నార్ ఉత్తమ ఉదాహరణలుగా నిలిచి ఉన్నారు.