కాలహరణమేలరా హరే! సీతా రామ!
కాలహరణమేల సుగుణజాల కరుణాలవాల
చుట్టి చుట్టి పక్షులెల్ల చెట్టు వెదకు రీతి భువిని
పుట్టగానే నీ పదముల బట్టు కొన్న నన్ను బ్రోవ
పొడవున ఎంతాడు కొన్న భూమిని త్యాగంబు రీతి
కడు వేల్పుల మున్న నీవు గాక యెవరు నన్ను బ్రోవ
దిన దినమును తిరిగి తిరిగి దిక్కు లేక శరణు జొచ్చి
తనువు ధనము నీదే యంటి త్యాగరాజ వినుత రామ
సుగుణములకు నెలవైన, కరుణానిధివైన ఓ హరీ! సీతారామా! నన్ను బ్రోచుటకు జాప్యమెందుకు? ప్రపంచమంతా తిరిగి తిరిగి పక్షులన్నీ చెట్టును వెదకి చేరిన రీతి, ఈ భూమిపై పుట్టగానే నీ పాదములను పట్టుకొని శరణు కోరాను. నన్ను బ్రోచుటకు జాప్యమెందుకు? ఈ భూమిలో ఎంత నిడివిగా పొగిడినా పొగిడించుకుంటారు, కానీ సహాయం చేసే సమయానికి వట్టి చేతులే చూపిస్తారు. ఆ విధంగానే మిగిలిన దేవతలందరూ నా చేత నుతించబడటం తప్ప నాకు వరములీయరు. కాబట్టి నీవు తప్ప నన్ను బ్రోచుటకు వేరెవ్వరు లేరు, జాప్యము వలదు. ప్రతి రోజు తిరిగి తిరిగి దిక్కులేక నీ శరణు కోరాను. ఈ దేహము, ధనము అన్నీ నీకై అనుకొన్నాను. నన్ను బ్రోచుటకు జాప్యము ఎందుకు?
శుద్ధ సావేరి రాగంలో స్వరపరచబడిన ఈ కృతిని బాలమురళీకృష్ణ గారు ఆలపించారు.
కామెంట్‌లు లేవు:
కామెంట్‌ను పోస్ట్ చేయండి