అహోబిలహరిని అర్చింతును - సాయికృష్ణ యాచేంద్ర గారి భక్తి గీతం

అహోబిలహరిని అర్చింతును

నా అంతరంగమే అర్పింతును

నరమృగప్రవృత్తులు ధరలో కలవని

ఎరిగింప ఈ రూపు ధరియించిన

భయావహం ఆ రూపం అయినా

దయామయం హృదయం

కన్నులలోన కరుణోదయం

మనసేమో శ్రితజనప్రియం 

రజోగుణం ఆ భావం అయినా

సాత్వికమే స్వభావం

తామసమణచగ దాల్చెను కాదా

త్రిగుణాతీతుడు దివ్యదేహం 

అహోబిలంలో వెలసిన శ్రీనరసింహస్వామిని భక్తితో అర్చింతును. నా అంతరంగమునే ఆయనకు సంపూర్ణంగా అర్పింతును. ఈ లోకంలో మానవప్రవృత్తులు, మృగప్రవృత్తులు రెండూ కలసి ఉన్నాయని తెలియజేయడానికి నరమృగరూపాన్ని ధరించిన ఆ స్వామిని ఆరాధింతును. చూడటానికి భయంకరమైన రూపమైనా, ఆయన హృదయం దయామయము. ఆయన కన్నులలో కరుణ ఉదయించును. ఆయన మనస్సు శరణాగతుల పట్ల ప్రేమతో నిండి ఉండును. ఆయన ఉగ్రభావం రజోగుణాన్ని సూచించినా, సహజస్వభావం సాత్వికమే. లోకంలోని తామసప్రవృత్తులను అణచివేయడానికే ఆ ఉగ్రరూపాన్ని ధరించెను. సత్త్వ, రజస్, తమోగుణాలను అవసరానుసారం వ్యక్తపరచినా, వాటన్నింటికీ అతీతుడైన పరమాత్మ ఆ నరసింహుడు. దుష్టులకు భయంకరుడై, భక్తులకు కరుణామయుడై, త్రిగుణాతీతమైన దివ్యస్వరూపంతో వెలసిన అహోబిలహరిని అర్చించి, నా హృదయాన్నే ఆయన పాదాలకు సమర్పింతును.

సాయికృష్ణ యాచేంద్ర గారి గీతాన్ని పుహళేంది బిలహరి రాగంలో స్వరపరచగా ఎస్పీ బాలసుబ్రహ్మణ్యం గారు ఈ కృతిని ఆలపించారు.