రక్తగణపతిం భజేహం - ముత్తుస్వామి దీక్షితుల కృతి

రక్తగణపతిం భజేహం

రత్న సింహాసన పతిం సురపతిం

రక్తాంబరధరం రాగ ద్వేషాది హరం

పార్వతీ ప్రియకరం మోహన కరం

పరశురామ క్షేత్ర ప్రభావం

పాయసాన్న హోమాది విభావం

పంచకృత్యాతీత స్వభావం

భక్తజనాది సమూహ వైభవం

సకల కార్యార్థ సిద్ధిదం స్థిరం

వామదేవాది పూజితం వరం

వారిజభవ వందిత వల్లభేశం

గురుగుహనుతం పరమశివ సుతం

రత్నసింహాసనానికి అధిపతియై దేవతలకు ప్రభువుగా విరాజిల్లే రక్తవరణములో ఉండే గణపతిని నేను భజిస్తున్నాను. ఎర్రని వస్త్రాలు ధరించి, రాగము, ద్వేషము మొదలైన అంతఃశత్రువులను తొలగించేవాడు, తన తల్లి పార్వతీదేవికి ప్రియమైనవాడు, మోహనమైన రూపం కలవాడు, పరశురామక్షేత్రమునందు ప్రత్యేక మహిమతో వెలసినవాడు; పాయసాన్నహోమము మొదలైన హోమారాధనలచే వైభవంగా పూజింపబడేవాడు, సృష్టి, స్థితి, సంహారము, తిరోభావము, అనుగ్రహము అనే పంచకృత్యాలకు అతీతమైన స్వభావం కలవాడు, భక్తజన సమూహాలచే చుట్టుముట్టబడి మహిమతో వెలిగేవాడు, సమస్త కార్యాల ఆశయాలను స్థిరంగా సిద్ధింపజేసే వరప్రదుడు, వామదేవుడు మొదలైనవారిచే పూజింపబడే శ్రేష్ఠుడు, కమలమున పుట్టిన బ్రహ్మచే పూజించబదే వల్లభేశుడు, సుబ్రహ్మణ్యునిచే స్తుతింపబడే పరమశివుని కుమారుడైన  రక్తగణపతిని నేను భక్తితో భజిస్తున్నాను.

ఇక్కడ పరశురామ క్షేత్రం అనగా పరశురాముడు సముద్రం నుండి తిరిగి పొందిన భూమిగా పురాణ సంప్రదాయంలో భావించే పశ్చిమతీర పవిత్ర ప్రాంతం — ప్రధానంగా కేరళ–కొంకణ తీరప్రాంతం. ఆ ప్రాంతంలో గణపతి ఆరాధన, హోమసంప్రదాయం విశేషంగా ఉండటాన్ని ఈ కృతి సూచిస్తుంది, అయితే కృతి స్వయంగా ఒక నిర్దిష్ట ఆలయనామాన్ని చెప్పదు.  

మోహన రాగంలో స్వరపరచబడిన ఈ ముత్తుస్వామి దీక్షితుల కృతిని మహారాజపురం సంతానం గారు ఆలపించారు.